Debati në parlament ishte i fortë. Kryefjalë e seancës së sotme ishte Kosova. Opozita kërkoi që të ishte i pranishëm Edi Rama për të shpjeguar qëndrimin për Kosovën dhe draftin që propozoi për Asociacionin.
Por në mungesë të kryeministrit fjalën e mori ministrja Elisa Spiropali, që pasi iu përgjigj Sali Berishës për të shkuarën dhe të tashmen bëri edhe një paralajmërim për të ardhmen duke i thënë se shumë shpejt do të dalë nga skena politike për të shkuar atje ku ka vendin. Por nuk e shpjegoi me tej se ku e ka vendin sipas saj. Insinuatat nuk munguan duke qenë se brenda ligjërimit të saj kishte shumë akuza penale.
“Këto janë faktet, por pasqyra dhëmb, tregon fytyrën që ke dhe nuk ka në këtë vend mjeshtër më të madh të projektimit të fajit diku tjetër përballë se ai që sapo doli nga kjo sallë dhe shumë shpejt do të dalë njëherë e mirë nga skena politike shqiptare për të shkuar aty ku e ka vendin” tha ajo.
