Disa ndryshime të papritura të motit kanë shënuar territorin shqiptar që nga sot, me rënien e dëborës së parë, një fenomen i pazakontë për muajin tetor. Meteorologia Lajda Porja, e ftuar në programin “Wake Up”, dha parashikime për motin dhe temperaturat në ditët në vazhdim.
Ajo njoftoi se, që nga sot deri të dielën, do të dominojnë nuancat dimri, me temperatura që do të zbresin deri në 2 gradë Celsius, dhe 0 gradë në zonat malore. Dëbora pritet të fillojë në zonat veriore dhe verilindore sonte, duke u shtrirë më pas edhe në juglindje. Porja vuri në dukje se ndryshe nga vitet e kaluara, ku kemi pasur mundësi të regjistrojmë temperatura për plazh edhe në tetor, këtë vit kjo situatë është e pazakontë.
Ajo gjithashtu theksoi që ky ‘dimër i shkurtër’ do të përfundojë në fundjavë, me prirje për ngritje të temperaturave deri në 27 gradë Celsius javën e ardhshme. Deri në datën 20 tetor, stuhitë tropikale do të jenë aktive, duke dhënë mundësinë për ngjarje të tjera atmosferike për territorin shqiptar dhe sidomos për gadishullin Iberik.
Përveç temperaturave të ulëta, Shqipëria do të përballet sonte me probleme nga ngrica dhe stuhi të forta ere, të cilat do të ndjehen që nga mbasditja. Këto stuhira do të intensifikohen në dy ditët e ardhshme, por pritet të pakësohen javën e ardhshme. Në Greqi, situata do të jetë më kritike, me reshje dhe stuhira të fuqishme.
Moti për këtë dimër parashikohet të ketë ditë të ftohta, megjithatë, sipas meteorologes, ditët e acarta do të jenë të numëruara, duke u përqëndruar kryesisht në janar dhe disa ditë në shkurt. Sipas saj, dimri i këtij viti duket se do jetë më i butë se zakonisht.
