Një ushtare 24-vjeçare britanike, identifikuar si Ciara Sullivan dhe anëtare e Artilerisë Mbretërore të Kuajve, ka humbur jetën pasi ra nga kali gjatë një shfaqjeje në Panairin Mbretëror të Kuajve në Windsor, njoftoi Policia e Luginës së Thames. Incidenti ndodhi menjëherë pasi ajo doli nga arena ku po mbahej shfaqja. Sullivan mori trajtim të menjëhershëm mjekësor, por kishte pësuar lëndime të rënda dhe ndërroi jetë në vendngjarje.
Një zëdhënës i Pallatit të Buckingham-it tha se Mbreti u “trondit dhe u trishtua” kur mori vesh për vdekjen e ushtares dhe do të jetë në kontakt me familjen e saj. Sipas zëdhënësit, ndërsa Madhëria e Tij dhe anëtarë të tjerë të Familjes Mbretërore ishin të pranishëm në arenë në kohën e incidentit, ata nuk u njoftuan për situatën deri më vonë.
Ushtria Mbretërore publikoi gjithashtu një njoftim, duke shprehur keqardhje të thellë dhe konfirmuar se anëtarja e Artilerisë Mbretërore të Kuajve të Trupës së Mbretit vdiq të premten më 15 maj pas një incidenti tragjik në Panairin Mbretëror të Kuajve në Windsor. Në njoftim theksohej se familja ishte njoftuar dhe se mendimet e ushtrisë ishin me ta në këtë kohë të vështirë.
Kapiteni i Policisë së Luginës së Thames, Michael Loebenberg, deklaroi se oficerët “nuk kanë gjetur asnjë rrethanë të dyshimtë” lidhur me vdekjen. Ai shtoi se po punohet me Ministrinë e Mbrojtjes, Degën e Hetimit të Aksidenteve të Mbrojtjes dhe me organizatorët e Panairit, HPower, për të mbledhur sa më shumë informacion të jetë i mundur për të kuptuar se si ndodhi aksidenti.
Organizatorët njoftuan se Panairi katër-ditor i Kuajve Mbretëror në Windsor do të vazhdojë sipas planit, por pa shfaqjen e Trupës së Mbretit dhe pa pjesëmarrjen e Artilerisë Mbretërore të Kuajve.
