Papa Leoni XIV ka shfuqizuar masat e kursimit të miratuara nga Papa Françesku më 23 mars 2021, të marra si përgjigje ndaj pandemisë Covid-19, duke i rikthyer kardinalëve të Kurisë Romake 10% të pagës që u ishte shkurtuar. Vendimi heq përfundimisht reduktimin prej 10% për kardinalët dhe shfuqizon përgjithësisht “masat e përmbajtjes së pagave” të vitit 2021.
Sipas Papës Leoni, këto masa mund të hiqen tani, pasi institucionet e Selisë së Shenjtë dhe të Shtetit të Vatikanit do të vijojnë përpjekjet për të garantuar qëndrueshmërinë ekonomike përmes mjeteve të tjera. Masa e vitit 2021 parashikonte shkurtime të ndryshme në varësi të kategorisë së punonjësve, si pjesë të përpjekjeve për të përballuar pasojat financiare të pandemisë.
Siç raportohet nga Vatican News, në vitin 2021 Papa Françesku uli pagat e kardinalëve të Kurisë me 10%. Paga e drejtuesve dhe sekretarëve të Dikastereve, si dhe e punonjësve të klasifikuar në nivelet C dhe C1, u ul me 8%, ndërsa për punonjësit klerikë dhe fetarë aplikohej një ulje prej 3%. Masa përfshinte gjithashtu ngrirjen e rritjeve dyvjeçare të pagave për vjetërsinë.
Këto kufizime preknin të gjithë stafin aktual; megjithatë, për punonjësit laikë aplikimi ishte i kufizuar vetëm për ata nga niveli i katërt i pagave e lart, duke mos prekur kategoritë me pagat më të ulëta. Me shfuqizimin e masave, kthimi i një pjese të pagave, veçanërisht i përqindjes prej 10% për kardinalët, shënon rënien e këtyre kufizimeve të vendosura në kulmin e emergjencës shëndetësore. Teksti u përcjell nga Top Channel.
