Pavarësisht shiut dhe motit të keq në Romë, rreth 30 mijë besimtarë u mblodhën në sheshin e Shën Pjetrit për të mirëpritur Papa Leonin XIV, i cili drejtori audiencën e tij të parë të përgjithshme pas ndërhyrjes kirurgjikale në mushkëri. Ati i Shenjtë falënderoi besimtarët për lutjet dhe mbështetjen dhe njoftoi rikthimin gradual në angazhimet e tij.
I buzëqeshur dhe në gjendje të mirë, Papa u rikthye në sheshin e Shën Pjetrit në Vatikan, duke përshkuar sheshin me papamobilin e bardhë dhe duke përshëndetur pelegrinët e mbledhur. Sipas të dhënave të publikuara nga zyra e shtypit e Vatikanit, në audiencën e përgjithshme morën pjesë rreth 30 mijë besimtarë, mes të cilëve kardinalë dhe peshkopë. Gjatë përshkimit të sheshit, Papa u ndal veçanërisht pranë fëmijëve, të cilët i bekoi, ndërsa u prit me duartrokitje nga të pranishmit.
Në hapje të audiencës, Leoni XIV u shpreh: “Gjëja e parë që dua t’ju them është faleminderit për mbështetjen përmes lutjeve tuaja. Falënderojmë Zotin për bujarinë e tij. Le ta ripërtërijmë të gjithë besimin tonë në mirësinë dhe mëshirën e Zotit.” Fjalët e tij u përqafuan nga të pranishmit gjatë ngjarjes që u zhvillua sipas programit të zakonshëm.
Ati i Shenjtë, 71 vjeç, iu nënshtrua më 13 tetor një ndërhyrjeje kirurgjikale për heqjen e lobit të poshtëm të mushkërisë së djathtë, pas diagnostikimit me adenokarcinomë pulmonare. Pas daljes nga spitali Gemelli në Romë, Papa kishte njoftuar se do t’i rikthehej gradualisht angazhimeve të tij. Audienca e kësaj të mërkure ishte e para që nga 7 tetori.
Ngjarja u zhvillua në kushte moti të paqëndrueshëm, por pjesëmarrja dhe pritja për Papën reflektuan mbështetjen e besimtarëve që kishin ardhur në sheshin e Shën Pjetrit për të marrë bekimin dhe për të dëgjuar fjalët e Tij.
