THETH- Banori i Thethit me aftësi ndryshe Bekim Koçeku është përballur me një situatë dhunë ndaj tij ditën e sotme. Në videon e siguruar nga Dosja.al, shihen disa efektivë policie janë bërë bashkë dhe kanë tentuar që të tërheqin zvarrë Bekimin, edhe pse ai ndodhet i shtrirë në tokë, për shkak të aftësive të kufizuara.
Pasi nuk ia dalin dot ta tërheqin, një efektiv ulet poshtë dhe tenton që ta marrë me dhunë Koçekun nga zona. Në këto momente, kanë ardhur banorët e tjerë dhe kanë ndërhyrë në mënyrë që dhuna ndaj Koçekut mos të vazhdonte më.
Çfarë po ndodh në Theth?
Në Theth ka nisur një perplasje mes autoriteteve policore dhe banorëve të zonës, për shkak të urdhërit të kryeministrit Rama për prishjen e ndërtimeve pa leje. Banorët kanë kundërshtuar këtë urdhër, duke kërkuar dialog mes tyre dhe shtyrje të afatit deri në përfundim të sezonit turistik. Por këto kërkesa të banorëve, duket se kanë rënë në vesh të shurdhët, pasi IKMT po vijon me shembjen e strukturave pa leje. Në këto kushte, banorët në shenjë proteste kanë paralajmëruar se do të mbyllin fare bujtinat.
