Panik në bordin e një avioni të kompanisë IndiGo kur një pajisje elektronike portative (power bank) mori flakë gjatë fluturimit, duke detyruar devijimin dhe një ulje emergjente në Hyderabad. Ngjarja ndodhi të dielën, më 11 tetor, në fluturimin 6E6115, nga Delhi për në Chennai, me një avion Airbus A321-251N.
Pamjet që qarkullojnë në rrjetet sociale tregojnë pasagjerët duke u përpjekur të shuajnë flakët duke e mbuluar baterinë me çantat e tyre. Sipas mediave indiane, ekuipazhi i kabinës ndërhyri menjëherë dhe arriti ta shuante zjarrin me aparatet kundër zjarrit. IndiGo konfirmoi se në bord u konstatuan tym dhe se pilotët ndoqën procedurat e sigurisë, duke devijuar fluturimin drejt Hyderabadit.
Avioni u ul pa probleme në Aeroportin Ndërkombëtar Rajiv Gandhi. Kompania bëri të ditur se të gjithë pasagjerët dhe anëtarët e ekuipazhit janë jashtë rrezikut. Udhëtarët do të vazhdojnë rrugën drejt Chennai-t me një avion tjetër, sipas deklarimit të IndiGo.
Kompania kërkoi ndjesë për shqetësimin e shkaktuar dhe informoi se po merr masa për të minimizuar vonesat, duke u ofruar pasagjerëve pije freskuese dhe informacione për zhvillimin e situatës. IndiGo theksoi se siguria e pasagjerëve dhe e ekuipazhit mbetet përparësia kryesore.
Ngjarja është dokumentuar edhe në rrjetet sociale, ku u shpërndanë video dhe imazhe të momentit kur pasagjerët dhe ekuipazhi ndërhynin për të kontrolluar zjarri në hapësirën e bagazheve të sipërme. Sipas burimeve mediatike të referuara, ndërhyrja e ekuipazhit me aparate kundër zjarrit ishte vendimtare për fikjen e flakëve dhe për të siguruar uljen e avionit pa incidente të tjera.
Rasti nxjerr në pah rreziqet që mund të shkaktojnë pajisjet elektronike portative gjatë fluturimeve dhe përfundoi pa dëmtime personale, me pasagjerët që vazhduan udhëtimin pas zëvendësimit të avionit. Top Channel.
