Policia e Shtetit njofton qytetarët për një skemë të re mashtrimi online, ku autorë të paidentifikuar kanë krijuar faqe interneti të rreme, të ngjashme me faqen zyrtare të Policisë, me qëllim përfitimin financiar në mënyrë të paligjshme. Këto faqe promovohen dhe shpërndahen përmes mesazheve SMS dhe email-eve të maskuara, të paraqitura si njoftime zyrtare për pagesën e gjobave, kryesisht për shkelje të qarkullimit rrugor, si tejkalim shpejtësie.
Policia sqaron se mesazhet në fjalë NUK janë dërguar nga institucionet shtetërore. Autorët kanë përdorur teknika të sofistikuara për të mashtruar qytetarët dhe për t’i orientuar drejt faqeve të fallcifikuara, ku u kërkohet vendosja e të dhënave bankare. Qëllimi i skemës është vjedhja e të dhënave bankare dhe përvetësimi i fondeve nga llogaritë e personave të prekur.
Si masë paraprake, Policia e Shtetit bën thirrje për kujdes maksimal dhe jep udhëzime konkrete: të mos klikohen linke të dyshimta të ardhura përmes SMS apo platformash të tjera; të mos vendosen kurrë të dhënat bankare në faqe të pa verifikuara; dhe çdo gjobë të verifikohet vetëm përmes kanaleve zyrtare. Për kontrollin e gjobave, qytetarët udhëzohen të përdorin portalin zyrtar e-Albania, në adresën e ofruar nga institucioni.
Në rast se qytetarët kanë futur tashmë të dhënat bankare në faqe të dyshimta, njoftimi rekomandon kontakt të menjëhershëm me bankën për bllokimin e kartës ose llogarisë dhe për marrjen e masave përkatëse, si dhe denoncimin e rastit pranë Policisë së Shtetit. Strukturat ligjzbatuese po punojnë për identifikimin dhe ndjekjen penale të autorëve të kësaj skeme.
Njoftimi synon parandalimin e humbjeve financiare dhe mbrojtjen e të dhënave personale, duke theksuar nevojën për verifikim dhe kujdes ndaj komunikimeve që pretendojnë të vijnë nga autoritetet shtetërore. Top Channel.
