Faza e parë e Abissnet Superiore mbylli dyert në një atmosferë elektrizuese dhe me ndryshime dramatike në krye të klasifikimit, pas fitores së Egnatias 1-0 ndaj Teutës. Ndeshja kishte peshë të veçantë jo vetëm për ecurinë e shkëlqyer të të dyja skuadrave deri në këtë pikë të sezonit, por edhe për sfidën në pankina: Edlir Tetova, trajneri që drejtoi Egnatian për më shumë se tre vjet dhe i la ekipit trofe dhe suksese historike, u paraqit si kundërshtar në krye të Teutës, ndërsa Egnatian tani e drejton Nevil Dede. Durrsakët kishin zhvilluar një fazë të parë mbresëlënëse dhe hynë në këtë përballje me synimin e qartë për të ruajtur kreun, por u përballën me skuadrën që Tetova kishte ndërtuar dhe lënë pas.
Takimi u zhvillua i luftuar dhe i mbyllur taktike, me të dyja palët që nuk preferuan të rrezikonin në pjesën e parë. Vendimtar u bë momenti i minutës së 75-të, kur Daniel Adjessa gjeti rrugën e rrjetës dhe shënoi golin e artë që hapi rezultatin dhe vulosi fatin e takimit në 1-0 për rrogozhinasit. Përpjekjet e Teutës në minutat e mbetura për të barazuar rezultatin nuk sollën ndryshim, duke i lënë durrsakët pa shans për reagim në pjesën shtesë të ndeshjes. Kështu, Teuta pësoi humbjen e parë të këtij sezoni pikërisht nga ish-ekipi i trajnerit të tyre.
Me këtë fitore Egnatia ngjitet në kuotën e 21 pikëve pas 9 javëve të luajtura dhe e mbyll fazën e parë të kampionatit në vendin e parë të klasifikimit, duke parakaluar Teutën. Teuta zbret në vendin e dytë me 20 pikë, pas një faze të parë që u cilësua fantastike, por që u mbyll me shijen e hidhur të ndëshkimit nga e shkuara e tyre në pankinë.
