Autoritetet në Itali dhe Zvicër kanë shpallur gatishmëri të lartë për shkak të kushteve atmosferike të rënda që po përballen, duke urdhëruar evakuime emergjente në zona alpine për shkak të reshjeve të ngarkuara të dëborës dhe rritjes së rrezikut për ortekë.
Në rajonin e Piemont, qyteti turistik Roquemole u evakuua menjëherë, me bllokimin e të gjitha akseve rrugore dhe ndalimin e hyrjeve. Rreth 40 persona u zhvendosën për në qytete fqinje ose hotele për sigurim.
Një situatë e ngjashme u raportua në Zvicër, ku rreth 50 banorë të komunës Orsier u detyruan të braktisnin shtëpitë e tyre për shkak të rrezikut të përshkallëzuar nga erërat e forta, të cilat kanë arritur shpejtësinë 189 km/h në stacionin meteorologjik Gran Vaudala, në lartësi prej 3,272 metrash. Meteorologët paralajmërojnë se reshjet e reja do të rrisin ndjeshëm rrezikun për ortekë, sidomos për ata që lëvizin jashtë pistave.
Sipas Shpëtimi Alpin Italian, gjatë javës së parë të shkurtit janë raportuar 13 viktima në malet italiane, me 10 prej tyre si rezultat i ortekëve. Dy skiatorë humbën jetën në afërsi të kufirit me Francën dhe Zvicrën, ndërsa të premten tre persona, dy britanikë dhe një francez, u vranë nga një ortek në Alpet franceze.
Një ngjarje e frikshme shkaktoi panik kur një familje britanike filmoi një ortek gjigant që lëshohej mbi një grup skiatorësh në Courmayeur në veriperëndim të Italisë. Videoja tregon një re të madhe bore që zbret me shpejtësi dhe mbulon zonën brenda sekondash, megjithatë, nuk janë raportuar lëndime nga ky incident specifik.
Autoritetet vazhdojnë të paralajmërojnë se situata mbetet kritike dhe u bëjnë thirrje turistëve dhe alpinistëve të shmangin lëvizjen jashtë pistave derisa kushtet atmosferike të stabilizohen.
