Një grup prej 34 fëmijësh të raportuar të zhdukur në Queens dhe Long Island u gjetën dhe u rikthyen në siguri gjatë një operacioni të gjerë 72-orësh, njoftuan zyrtarët. “Long Island Children Rescue Operation” u zhvillua nga e marta deri të enjten dhe përfshiu fëmijë që kishin rezultuar të zhdukur nga disa ditë deri në 10 vjet. Të gjeturit ishin të moshave 7 deri 18 vjeç; pas gjetjes ata u lidhën me shërbime mbështetëse, përfshirë kujdesin mjekësor dhe nevojat e tjera bazë.
Autoritetet thanë se pjesa më e madhe e fëmijëve ishin larguar nga shtëpitë me dëshirën e tyre, por disa kanë qenë viktima të shfrytëzimit të rëndë dhe trafikimit të qenieve njerëzore. Operacioni u koordinua nga një qendër komandimi në Garden City, në Nassau County, dhe përfshiu rreth 100 profesionistë nga 40 agjenci dhe organizata. Sipas raportimeve të “Newsday”, mes të gjeturve ishin 18 nga Nassau County, 12 nga Suffolk County dhe 4 nga Queens; megjithatë zyra e guvernatorit njoftoi se 31 raste të tjera të fëmijëve të zhdukur në zonë mbeten ende të hapura.
Në nivel shteti, Superintendenti i Policisë së Shtetit të Nju Jorkut, Steven James, deklaroi se gjatë vitit 2025 u raportuan 10,629 fëmijë nën moshën 18 vjeç si të zhdukur. Rreth 94% e tyre ishin fëmijë që kishin larguar vetë. Gjatë të njëjtit vit autoritetet mbyllën 10,672 raste të fëmijëve të raportuar të zhdukur nga viti 2025 ose vitet e mëparshme, ndërsa në fund të vitit mbetën 1,079 raste aktive në të gjithë shtetin.
Ky ishte operacioni i katërt i madh i këtij lloji në Nju Jork; në aksionet e mëparshme në Erie County, Capital Region dhe Westchester autoritetet kishin gjetur gjithsej 168 fëmijë dhe adoleshentë të zhdukur. Kevin Branzetti, drejtues i National Child Protection Task Force, theksoi se gjetja e një fëmije të zhdukur shpesh kërkon një përpjekje të koordinuar dhe se puna vazhdon pas rikthimit: autoritetet duhet të kuptojnë arsyet e largimit, përvojat gjatë mungesës dhe llojin e ndihmës që i duhet. Në shkurt, një operacion i gjerë në Westchester kishte çuar në gjetjen e 43 fëmijëve me pjesëmarrjen e rreth 70 agjencive.
