Operacioni antidrogë i koduar “Baza”, i zhvilluar nga shërbimet e Policisë së Tiranës, është finalizuar si pjesë e aksioneve kundër grupeve që shesin lëndë narkotike. Si rezultat i veprimeve operative dhe operacionale të Forcës së Posaçme “Shqiponja” në bashkëpunim me specialistët e Seksionit për Hetimin e Narkotikëve, u arrestua një person dhe u shpallën në kërkim dy të tjerë.
Në ambientet e përbashkëta të një pallati dhe në një automjet të parkuar përballë tij u sekuestruan lëndë narkotike të ndryshme, të cilat dyshohet të ishin vendosur aty me qëllim shitjen. Sasia e sekuestruar përfshin 1 kg e 32 g kokainë, 377 g Cannabis Sativa dhe 13 tableta MDMA, si dhe automjetin tip “Mazda”.
Në kuadër të operacionit u arrestua shtetasi G. D., 26 vjeç. U shpallën në kërkim shtetasit A. A., 26 vjeç, dhe D. A., 24 vjeç. Sipas policisë, tre shtetasit, në bashkëpunim me njëri-tjetrin, dyshohet se kishin siguruar dhe fshehur në ambientet e përbashkëta të pallatit dhe në automjet lëndë narkotike të llojeve të ndryshme (kokainë, Cannabis Sativa dhe MDMA) me qëllim shitjen në sasi ose në doza.
Forcat e rendit deklarojnë se po punohet intensivisht për lokalizimin dhe kapjen e dy shtetasve të shpallur në kërkim, si dhe për identifikimin dhe nxjerrjen para përgjegjësisë penale të personave të tjerë që mund të jenë përfshirë në këtë rast. Materialet procedurale nga hetimi janë referuar Prokurorisë së Tiranës për veprime të mëtejshme.
