Avokatët e Sean “Diddy” Combs kanë kërkuar të tërhiqen nga përfaqësimi i tij në një padi për shpifje, duke argumentuar mospagesën e tarifave ligjore dhe mungesën e bashkëpunimit. Sipas dokumenteve gjyqësore të paraqitura nga firma Sher Tremonte LLP, e siguruar nga Daily Mail, partneri Michael Tremonte ka depozituar një mocion për të tërhequr përfaqësimin e Combs në çështjen kundër Courtney Burgess, Ariel Mitchell dhe Nexstar Media Inc., kompania mëmë e NewsNation.
Në dokumente Tremonte thotë se Combs ka “debite të konsiderueshme” ndaj Sher Tremonte për shërbimet ligjore dhe se firma ka vazhduar të ofrojë shërbime ndërkohë që nuk ka marrë pagesa për më shumë se gjashtë muaj. Sipas Avokatit, pagesa e fundit e klientit lidhej me tarifat dhe shpenzimet e krijuara në fund të vitit 2025, dhe një pjesë e konsiderueshme e shumës totale të papaguar vjen nga faturat e papaguara për më shumë se 90 ditë. Sher Tremonte pretendon gjithashtu se ka pasur një “ndërprerje të plotë të bashkëpunimit dhe komunikimit” me Combs, duke përmendur se ai nuk ka qenë i disponueshëm për më shumë se katër muaj për komunikim në kohë dhe të drejtpërdrejtë mbi çështjet ligjore, çka sipas firmës e ka bërë përfaqësimin “jashtëzakonisht të vështirë” dhe ka kufizuar aftësinë e saj për t’i ofruar shërbime ligjore efektive. Avokatët thonë se e kanë paralajmëruar disa herë Combs-in se do të kërkonin tërheqjen nëse tarifat nuk do të paguheshin dhe nëse mungonte bashkëpunimi.
Përfaqësuesi i Combs ka mohuar se klienti thjesht ka refuzuar të paguajë faturat, duke thënë se ai ka vendosur të ndryshojë avokatët pasi pretendon se firma e ngarkonte me tarifa të tepërta. “Kam marrë vendimin për të ndërruar avokatin sepse nuk do të lejoj askënd të përfitojë nga unë duke më ngarkuar më shumë seç duhet dhe duke më fryrë faturat që nuk janë miratuar kurrë,” thuhet në deklaratën e përfaqësuesit, i cili e ka cilësuar rastin si një “mosmarrëveshje biznesi” dhe ka thënë se diskutimet për tarifat e papaguara janë pjesë e kësaj mosmarrëveshjeje.
Përfaqësuesi përmendi gjithashtu avokatin Jonathan Davis, i cili sipas tij ka qenë avokati civil i Combs për 33 vjet dhe vazhdon ta përfaqësojë atë dhe kompanitë e tij në procese gjyqësore që prej arrestimit në vitin 2024. Combs aktualisht ndodhet në burg pas dënimit vitin e kaluar për dy vepra penale që lidhen me prostitucionin; Davis ka deklaruar se vazhdon ta përfaqësojë dhe se “e vërteta do të dalë në dritë.”
