Në orët e fundit të armëpushimit, presidenti amerikan Donald Trump deklaroi se nuk do ta zgjasë atë dhe paralajmëroi Iranin për rikthimin e luftës nëse nuk ulet në tryezën e bisedimeve. Udhëheqësi Suprem, Mojtaba Khamenei, i ka dhënë ‘OK’ delegacionit iranian për bisedimet me Shtetet e Bashkuara, por Pakistani, vendi pritës i dytë të raundit të bisedimeve, njoftoi se ende nuk ka marrë një konfirmim zyrtar nga Teherani.
Trump i kërkoi sërish Iranit të pranojë negociatat për t’i dhënë fund luftës dhe paralajmëroi se Forcat Hapësinore Amerikane kanë vendosur kamera në çdo centimetër të objekteve bërthamore iraniane. Ai kërkoi gjithashtu që udhëheqësit iranianë të lirojnë tetë vajza, të cilat sipas tij regjimi islamik do t’i ekzekutojë përpara negociatave. “Do ta vlerësoja shumë lirimin e këtyre grave. Ju lutem mos u bëni keq atyre! Do të ishte një fillim i shkëlqyer për negociatat tona,” tha presidenti i Shteteve të Bashkuara.
Raundi i planifikuar i bisedimeve do të zhvillohet të mërkurën në Islamabad. Delegacioni amerikan do të udhëhiqet nga zëvendëspresidenti JD Vance. Pakistani njoftoi se po vijon përpjekjet për të bindur udhëheqësit iranianë që të marrin pjesë edhe në raundin e dytë të negociatave. Autoritetet pakistaneze i kanë bërë thirrje të dy palëve, Uashingtonit dhe Teheranit, që të zgjasin armëpushimin dhe të ndjekin rrugën diplomatike si mjetin e vetëm për të arritur paqen dhe stabilitetin në rajon.
Lajmi për miratimin e delegacionit iranian nga Udhëheqësi Suprem mbetet pa konfirmim zyrtar nga Teherani për autoritetet pakistaneze, ndërsa Shtetet e Bashkuara shtojnë presionin për të nisur bisedimet dhe për lirimin e personave që, sipas deklaratave amerikane, janë në rrezik ekzekutimi përpara negociatave.
