Aston Villa ka paralajmëruar se do të ndërmarrë veprime ligjore ndaj ish-futbollistit dhe analistit televiziv Jamie Carragher, pas komenteve të tij për klubin dhe mbështetësit. Vendimi u bë publik nga bashkëpronari dhe presidenti Nassef Sawiris përmes një deklarate të publikuar në rrjetet sociale të klubit, mbrëmjen e së premtes.
Shkak për reagimin ishin komentet e Carragher në emisionin “Stick to Football”, ku ai diskutoi mundësinë që trajneri Unai Emery të largohet nga Aston Villa për të marrë drejtimin e Manchester United. Carragher argumentoi se Manchester United është një klub i një niveli më të lartë dhe se Emery mund të tundohej nga mundësia për të drejtuar një skuadër me histori dhe ambicie më të mëdha. Gjatë diskutimit ai iu drejtua tifozëve të Aston Villa-s me një shprehje fyese dhe deklaroi se klubi “nuk do të jetë kurrë Manchester United”.
Këto deklarata shkaktuan pakënaqësi në radhët e drejtuesve të klubit nga Birminghami. Sawiris konfirmoi se Aston Villa nuk do ta lërë çështjen me kaq, duke thënë: “Aston Villa do të nisë procedura ligjore ndaj Jamie Carragher për fyerjet e tij të papranueshme ndaj klubit dhe tifozëve tanë. Aston Villa nuk do të lejojë askënd të pengojë ngjitjen tonë në futbollin anglez dhe atë evropian.”
Carragher kishte folur gjithashtu për sukseset e Emery-t, duke vlerësuar punën e trajnerit spanjoll dhe nënvizuar se një trajner me arritje të tilla mund të kërkojë një sfidë të re në një klub si Manchester United. Ndërkohë, Emery ka shprehur kënaqësinë për qëndrimin te Aston Villa, ku sipas tij ka ndërtuar një projekt sportiv dhe ka marrë kompetenca të gjera në drejtimin e skuadrës. Trajneri ka deklaruar gjithashtu se synimi i tij është ta kualifikojë klubin në Champions League në çdo sezon.
Në sfond të kësaj çështjeje qëndron situata te Manchester United, i cili po përjeton presion për shkak të rezultateve dhe situatës së trajnerit Michael Carrick, çka ka nxitur diskutimet për emra të mundshëm që mund të marrin drejtimin e skuadrës në të ardhmen.
