Në Balldre të Lezhës, ditën e diel u krye një atentat i dyfishtë në të cilin mbetën të vrarë Kreshnik Mujeci dhe bashkëshortja e tij, Gentjana Mujeci, prindër të katër fëmijëve. Policia ka shpallur në kërkim tre persona si autorë të dyshuar të ngjarjes.
Eksperti i kriminalistikës Ervin Karamuço, duke folur në emisionin “Top Story”, dha detaje rreth ngjarjes dhe theksoi se Lezha po kthehet në epiqendrën e përplasjeve të forta për shkak të hakmarrjeve. Ai deklaroi se në qarkun e Lezhës ka rreth 306 familje të ngujuara ose në rrezik të lartë për të humbur jetën për shkak të konflikteve dhe gjakmarrjeve, duke vënë në dukje se përveç proceseve zyrtare gjyqësore, zhvillohen edhe “gjyqe private” që shpesh përfundojnë me vendime për vdekje.
Karamuço shprehu keqardhje për vdekjen e bashkëshortes, e cila la katër fëmijë jetimë. Sipas tij, thuhet se autorët nuk e dinin që bashkëshortja ishte në makinë, pasi xhamat ishin të errësuar. Ai informoi se një person e ka kryer aktin dhe se një nga të kërkuarit dyshohet se ishte nën hetim për një tentativë vrasjeje më parë. Eksperti përmendi edhe se persona më të rinj kanë vepruar me menjëherë dhe kanë thënë se dispononin armë, duke mos u përpjekur shumë të fshiheshin.
Ngjarja, sipas fjalëve të tij, u zbardh në rreth 12 orë; u gjet një makinë e marrë me qira, e padjegur. Policia po heton shtegun e makinës dhe po merr në konsideratë mundësinë që autorët të kenë kaluar kufirin, me dyshime për arratisje drejt Kosovës, megjithëse Karamuço theksoi se deri tani ka aludime dhe hipoteza. Ai njoftoi gjithashtu se disa persona janë identifikuar.
Duke përsëritur shqetësimin për rritjen e përplasjeve dhe hakmarrjeve në zonë, eksperti paraqiti ngjarjen si pjesë të një fenomeni më të gjerë të konflikteve të dhunshme në qarkun e Lezhës. (Burimi: Top Channel)
