Sot u mbush nje vit nga sulmi i grupit terrorist serb në Banjskë të Zvecanit, ku humbi jetën rreshteri Afrim Bunjaku, ngjarje që e çoi dialogun mes Pirshtines dhe Beogradit në pikën zero.
Në shënimin e një vjetorit të rënies së heroit, policit të Kosovës, Afrim Bunjaku, kryeministri Albin Kurti së bashku me kryetarin e kuvendit, Glauk Konjufca dhe ministrin e punëve të Brendshme Xhelal Sveçlën vizituan familjen e tij.
Pas vizitës, krerët e shtetit bënë homazhe në varrezat në Vushtrri.
Të pranishëm ishin edhe ministrja e drejtësisë Albulena Haxhiu, ambasadori i Amerikës në Prishtinë, Jeffery Hovenier, pjesëtarë të Policisë së Kosovës, djali i Afrim Bunjakut dhe të gjithë deputetët e Lëvizjes Vetëvendosje.
Në një deklaratë për mediat shefi i qeverisë së Kosovës bëri sërish përgjegjëse Serbinë për këte sulm terrorist , ndërsa kërkoi drejtësi.
“Duhet theksuar se Serbia është përgjegjëse, andaj Serbia duhet të japë përgjegjësi, e në këtë pikë ne kërkojmë ndihmën, mbështetjen e përkrahjen e faktorëve ndërkombëtar. E forcat të cilat ishin të financuara dhe të dirigjuar nga Serbia me paramilitarë të cilët kishin shumë më shumë armatim se sa Afrim Bunjaku me shokë, ikën me turp, i lanë të vrarit dhe të plagosurit e tyre dhe sot fshihen nëpër Serbi sepse e din që e kanë humbur betejën me shtetin dhe popullin tonë liridashës”, tha Kurti.
Edhe Presidentja e vendit Vjosa Osmani kujtoi rreshterin Afrim Bunjaku.
“Sot një vit, rreshteri Afrim Bunjaku ra dëshmor për të treguar edhe një herë, siç kemi dëshmuar ndër shekuj, se kjo tokë është atdheu ynë i përjetshëm. Se liria nuk ka çmim. Se Kosova është dhe do të mbetet e pandashme, e liria dhe kufijtë tanë të paprekshëm! Sot e përgjithmonë!”, tha Osmani.
Ndërsa Ambasada gjermane në Kosovë deklaroi se nuk do të harrohet sakrifica e rreshterit të Policisë së Kosovës, Afrim Bunjaku, duke shtuar se autori i sulmit, Milan Radoiçiq, e ka pranuar përgjegjësinë por është ende i lirë në Serbi.
Rreth dy javë më parë, Prokuroria Speciale e Kosovës ngriti aktakuzë ndaj 45 personave, ndërsa 3 prej tyre tashmë janë të arrestuar. Në mesin e të akuzuarve është edhe Milan Radoiçiqi, ish-nënkryetar i Listës Serbe, i cili ka marrë përgjegjësinë për sulmin.
Në aktakuzën e Prokurorisë Speciale thuhet se qëllimi i grupit të udhëhequr nga Radoiçiqi ka qenë shkëputja e pjesës veriore të Kosovës dhe bashkimi i saj me Serbinë. Dokumenti tregon se grupi nisi të organizohej në tetor të 2021-s, në një takim në të cilin ishte i pranishëm edhe presidenti i Serbisë, Aleksandër Vuçiq. Sipas aktakuzës, Serbia, ndër të tjera, i ka ofruar Radoiçiqit edhe infrastrukturën e nevojshme ushtarake për trajnimin e pjesëmarrësve.
