Një pjesë e humbur e një rakete SpaceX, pjesa e sipërme e një Falcon 9, pritet të përplaset me Hënën. Objekti, me madhësinë e një ndërtese pesëkatëshe dhe me peshë mbi 4,000 kilogramë, ka qenë duke lëvizur prej kohësh në mënyrë të pakontrolluar në orbitë me shpejtësi rreth 2.43 kilometra në sekondë. Sipas NASA-s, përplasja parashikohet të ndodhë rreth orës 07:35 dhe nuk konsiderohet të paraqesë ndonjë rrezik për Tokën.
Ekspertët thonë se ngjarja nuk do të jetë e dukshme me sy të lirë nga Toka, por ata që kanë qasje në teleskopë të fuqishëm mund të jenë në gjendje të vëzhgojnë një shkëndijë të shkurtër në sipërfaqen e Hënës në momentin e goditjes. NASA ka njoftuar se do të vazhdojë të vëzhgojë vendin e impaktit për qëllime shkencore dhe për të mbledhur të dhëna hënore që të ndihmojnë në përmirësimin e teknikave për gjurmimin e objekteve në hapësirë. Zëdhënësi i NASA-s, Jimi Russel, tha se ndërsa agjencia do të vazhdojë vëzhgimet për arsye shkencore, “nuk ka rrezik për Tokën”.
Shkencëtarët synojnë të përdorin ngjarjen për të marrë të dhëna që mund të ndihmojnë në kuptimin e ndikimeve të trupave të mëdhenj artificiale në sipërfaqen hënore dhe për të përsosur metodat e monitorimit të objekteve në orbitë. Një përplasje e tillë ofron mundësinë për të studiuar një goditje live dhe për të testuar instrumentet dhe modelet që parashikojnë sjelljen e objekteve të pakuptuara në hapësirë.
Dr. Matt Bothwell, astronom publik në Universitetin e Kembrixhit, përshkroi ngjarjen si një rast të rëndësishëm vëzhgimi, duke thënë: “Është diçka vërtet e madhe që po përplaset me Hënën. Nuk është aspak e rrezikshme, ne mund ta shikojmë shfaqjen”. Në pritje të impaktit, observatorët profesionistë dhe institutet shkencore do të përqendrojnë instrumentet e tyre për të regjistruar çdo njollë drite apo ndryshim në sipërfaqen hënore që mund të rezultojë nga goditja.
