Kryeministri Edi Rama mori pjesë në Konferencën e IX Ndërqeveritare për mbylljen e tre grupkapitujve të tjerë për anëtarësimin e Shqipërisë në BE. Në fjalën e tij, Rama deklaroi se ky zhvillim përbën një “gur kilometrik tjetër” në rrugëtimin e pakthyeshëm të Shqipërisë drejt Bashkimit Europian, duke theksuar se është rënë dakord për mbylljen e tre kapitujve të rëndësishëm negociatorë.
Ai vuri në dukje se ky hap nuk është vetëm formal, por një vlerësim që tregon se Shqipëria po ecën përpara dhe se reformat po japin rezultate. Sipas tij, fakti i sotëm dërgon edhe një mesazh të rëndësishëm të asaj që Rama e quajti “Epoka e re”: “Shqipëria jep rezultate, BE jep rezultate. Shqipëria ecën përpara dhe BE reagon për këtë.”
Rama përmendi emra të pjesëmarrësve në konferencë dhe duke u drejtuar atyre shprehu mirënjohje: “Nuk mundem veçse të theksoj, Thomas, ishte shumë irlandeze. Super e martë.” Ai falënderoi veçanërisht Marta-n për durimin dhe këmbënguljen në drejtimin e procesit, duke thënë se ajo e mbajti vendin në rrugën e duhur pavarësisht pengesave.
Kryeministri po ashtu theksoi synimin për të afruar standardet europiane me qytetarët shqiptarë dhe për të ndërtuar “Shqipërinë që duam të shohim si anëtare të BE-së.” Si provë të përparimit ai përmendi ndryshimin në pritshmëritë dhe durimin e qytetarëve: sipas tij, “njerëzit duan më shumë dhe janë gjithmonë më pak tolerantë ndaj asaj që nuk funksionon.” Për këtë arsye, Rama nënvizoi nevojën për të vazhduar përpara dhe për të dhënë rezultate konkrete për qytetarët.
Lajmi publikohet nga Top Channel.
