Në Qarkun e Lezhës, situata aktuale është e qetë, pa reshje shiu gjatë 24 orëve të fundit, por temperaturat nën zero kanë shkaktuar ngrica në disa segmente rrugore. Në Njësinë Administrative Fushë Kuqe, niveli i ujërave ka pësuar një rritje të moderuar për shkak të çarjes së argjinaturës në krahun e Durrësit, duke e bërë këtë zonë “zonë të kuqe”. Autoritetet janë në gatishmëri për çdo përkeqësim, përfshirë edhe evakuime.
Gjatë ditës, do të vazhdojnë punimet për forcimin e argjinaturave në Mamurras, si dhe pastrimi i inerteve dhe grykëderdhjeve të përrenjve. Po ashtu, do të rinisën punimet në aksin Skuraj–Vinjollë, ndihmuar nga Forcat e Armatosura. Grupi i punës për vlerësimin e dëmeve do të jetë në terren për të verifikuar dëmet në banesa dhe infrastrukturë. Rreth 50 forca dhe mjete janë angazhuar për këto qëllime, përfshirë eskavatorë dhe mjete zjarrfikëse.
Bashkia Lezhë ka bërë me dije se ekipet po punojnë në pastrimin e mbeturinave dhe ujit nga bodrumet me mjete të MZSH-së. Në Mirditë, reshjet janë ndalur, por temperaturat e ulëta kanë shkaktuar akull në disa segmente rrugore, pa raporte për bllokime të rrugëve. Kontingjente për monitorimin e situatës janë angazhuar gjatë ditës.
Drejtoria Rajonale e Ujësjellësit (DRUK) ka raportuar se puna vijon me të gjitha mjetet dhe personelin në terren. Gjatë natës, ka pasur ndërprerje të energjisë elektrike në disa hidrovorë, por situata është normalizuar. Strukturat vendore dhe ato të emergjencave civile vazhdojnë të monitorojnë situatën dhe të qëndrojnë në gatishmëri për zhvillime të mëtejshme.
