Ka nisur seanca e themelit në Gjykatën e Posaçme për çështjen e hakerimit të kompjuterëve të dy prokurorëve të SPAK. Në sallë janë paraqitur tre të pandehurit: Agim Ismailaj, Arnold Rrokaj dhe Zambak Gjoni, së bashku me avokatët e tyre. SPAK ka ngritur akuza për hakerimin e sistemeve kompjuterike dhe ndërhyrjen në e-mailet e prokurorëve të posaçëm.
Gjatë seancës, relatori i çështjes, Erjon Çela, informoi se Top Channel kishte kërkuar ndjekjen e procesit me kamera, por të tre të pandehurit refuzuan këtë kërkesë. Si rezultat, gjykata vendosi që procesi të zhvillohet pa praninë e kamerave, duke iu referuar vendimit të Këshillit të Lartë të Gjyqësorit (KLGJ).
Në vijim, prokurori Bledar Maksuti u paraqit për të shqyrtuar provat dhe dëshmitë. Të pandehurit, gjatë identifikimit, deklaruan se nuk ishin të dënuar më parë dhe emëruan avokatët që do t’i përfaqësonin. Agim Ismaili përmendi se kishte zgjedhur dy avokatë, ndërsa Rrokaj dhe Gjoni gjithashtu shprehën se ishin të padënuar dhe kishin zgjedhur avokatët e tyre.
Pas identifikimit, gjykata vazhdoi me diskutimin mbi kërkesat paraprake. Avokati Afrim Shehu kërkoi që të vihej në dispozicion vendimi i seancës paraprake për të mundësuar një mbrojtje më efektive. Gjykata e përmendi se kërkesa për vendimin e seancës paraprake duhej bërë përmes e-mailit ose në çdo formë tjetër.
Në përfundim, gjykata vendosi të shtyjë seancën për në datën 27 prill, në orën 11.
