Kontrolle të befasishme në Tiranë dhe operacione antidrogë në Vlorë e Sarandë janë zhvilluar brenda 24 orëve të fundit me qëllim rritjen e sigurisë publike dhe goditjen e veprimtarive të paligjshme. Policia ka shoqëruar persona, sekuestruar armë dhe lëndë narkotike, dhe ka arrestuar katër të dyshuar në dy operacione të ndara.
Në kryeqytet, Forca e Posaçme Operacionale, Forca “Shqiponja” dhe Policia Rrugore kryen kontrolle në akset kryesore dhe zona të ndryshme të qytetit. Gjatë aksionit u kontrolluan 61 automjete luksoze dhe u verifikuan 82 persona me precedentë kriminalë. Shërbimet hoqën 61 xhama të errësuar që ishin në kundërshtim me Kodin Rrugor, ndërsa pesë automjete u ndaluan për verifikime të mëtejshme, përfshirë një mjet të blinduar. Si pasojë e kontrolleve u shoqëruan edhe gjashtë persona, te cilët iu gjetën lëndë narkotike dhe armë të ftohta, dhe një drejtues automjeti rezultoi i dehur.
Në Qarkun e Vlorës, dy operacione policore çuan në arrestimin e katër personave dhe sekuestrimin e një arme zjarri, pesë kilogramëve cannabis, një sasie kokaine, gjashtë fishekëve dhe dy automjeteve. Një 30-vjeçar u arrestua në Vlorë pasi iu sekuestruan armë dhe lëndë narkotike. Në Sarandë u kapën tre persona duke transportuar 5 kilogramë cannabis, që dyshohet se destinacionin e kishte tregun e Sarandës dhe të Ksamilit.
Policia njofton se hetimet për zbardhjen e plotë të këtyre veprimtarive kriminale vijojnë, dhe thekson se kontrollet do të vazhdojnë me politikë tolerancë zero ndaj çdo shkeljeje.
