Bilanci financiar i Newcastle United, deri në 30 qershor 2025, tregon një fitim prej rreth 40 milionë eurosh, i cili përfshin shitjen e stadiumit St. James Park te PZ Newco Ltd, një kompani e krijuar tri javë para transaksionit, e vlerësuar mbi 150 milionë euro. PZ Newco Ltd është në pronësi të Fondit Saudit të Investimeve Publike, i cili zotëron edhe klubin. Të dy këto transaksione janë të lejuara nga Premier League, por janë nën shqyrtimin e UEFA-s, e cila ka vendosur norma të rrepta për financat e klubeve.
Newcastle përballet me rrezikun e shkeljes së këtyre normave, duke marrë parasysh se humbjet e tij për periudhën trevjeçare që përfundoi në qershor kalojnë 200 milionë euro. Klube si Chelsea dhe Aston Villa kanë shkelur normat e UEFA-s dhe janë gjobitur me 31 dhe 11 milionë euro. Sipas rregullave të UEFA-s, Newcastle detyrohet gjithashtu të reduktojë shpenzimet në merkato për shkak të marrëveshjeve me klube të tjera në pronësi të PIF. Një shembull është shitja e Allan Saint-Maximin te Al Ahli për 26 milionë euro, e cila po llogaritet si e pavlefshme nga UEFA.
Përveç kësaj, klubet duhet të respektojnë një klauzolë që lejon shpenzimin e vetëm 70% të të ardhurave për pagat, blerjet dhe honoraret për agjentët. Përkundër këtyre kufizimeve, Newcastle pretendon se shitja e stadiumit është pjesë e planit për zhvillimin e tij dhe jo një mënyrë për të shmangur normat financiare të UEFA-s. Megjithatë, klubi pranon se ky transaksion ka ndihmuar në krijimin e të ardhurave për investime.
Në këtë kontekst, Newcastle duket se do të jetë i detyruar të shesë disa nga lojtarët e tij më të mirë, me emra si Anthony Gordon dhe Sandro Tonali që përmenden si të mundshëm për largim. Shefi Ekzekutiv i klubit, David Hopkinson, tha se strategjia e klubit është të bëjë blerje të mençura dhe të shesë me kushte të favorshme, duke theksuar se çdo blerje e madhe do të kërkojë shitjen e një lojtari.
