Kryeministri izraelit Benjamin Netanyahu u shpreh hapur kundër mundësisë që Shtetet e Bashkuara t’i shesin avionë F-35 Turqisë, pak orë pasi presidenti amerikan Donald Trump tha se administrata po e shqyrton opsionin. Në një intervistë për CNN, Netanyahu paralajmëroi se një vendim i tillë do të kishte pasoja të rënda për sigurinë rajonale dhe do të cenonte ekuilibrin ushtarak në Lindjen e Mesme. “Shitja e avionëve F-35 nuk e bën Turqinë një shtet mik të Shteteve të Bashkuara”, tha ai, duke shtuar se Turqia drejtohet nga “një regjim i infektuar me Vëllazërinë Myslimane, e cila i urren Shtetet e Bashkuara”.
Duke iu referuar presidentit turk Recep Tayyip Erdogan, Netanyahu deklaroi se ai nuk është “pikërisht një aleat shembullor” dhe e akuzoi se kërcënon drejtpërdrejt Izraelin: “Ai kërcënon të shkatërrojë vendin tim, shtetin e vetëm hebre”. Komentet vijnë ndërsa marrëdhëniet mes dy vendeve janë përkeqësuar; javën e kaluar ministri i Jashtëm turk Hakan Fidan tha se Izraeli është “bërë një barrë që njerëzimi nuk mund ta durojë më”, deklaratë e cilësuar nga zyrtarët izraelitë si “nxitje të gjenocidit”.
Netanyahu tha se i kishte shprehur personalisht shqetësimin presidentit Trump dhe i kishte kërkuar të mos miratonte shitjen e F-35, pasi “do të shkatërronte ekuilibrin e fuqisë në Lindjen e Mesme”. Megjithatë Trump, i pranishëm në Turqi për samitin e NATO-s, la të kuptohet se mund të rishikojë ndalimin e mëparshëm dhe e përshkroi Turqinë si një aleate “të jashtëzakonshme”. Trump dhe Erdogan zhvilluan një takim në Ankara për marrëdhëniet dypalëshe dhe çështjet e sigurisë. Netanyahu minimizoi çdo përçarje me presidentin amerikan, duke thënë se secili bën “atë që është më e mira” për vendin e vet dhe se interesat shpesh përputhen.
Në intervistë ai komentoi edhe marrëveshjen e fundit midis SHBA-së dhe Iranit, duke shmangur kritikën direkte por duke vënë në dukje se ajo nuk trajton çështje kyçe për Izraelin: programin bërthamor, raketat balistike, mbështetjen për grupet e armatosura dhe rezervat e uraniumit të pasuruar. Netanyahu gjithashtu kritkoi figura të Partisë Demokratike për deklarata mbi Izraelin dhe hodhi poshtë përgjegjësinë personale për rënien e mbështetjes publike, duke fajësuar rrjetet sociale.
Ai komentoi rritjen e dhunës së kolonëve në Bregun Perëndimor, duke i përshkruar autorët si rreth 150 “delinkuentë të mitur”, dhe tha se policia dhe ushtria po ndërmarrin veprime, por gjykatat janë “shumë të buta”. Organizatat ndërkombëtare dhe grupet izraelite raportojnë rritje të incidenteve; sipas Yesh Din, në një muaj u regjistruan 305 incidente, përfshirë sulme ndaj civilëve palestinezë, dëmtime pronash dhe konfiskime tokash.
