Deklarata të forta të Donald Trump pritet të shkaktojnë reagime në qeverinë britanike, pasi gjatë vizitës së Mbretit Charles III në Shtetet e Bashkuara ai sugjeroi se mbreti “ndoshta do ta kishte ndihmuar” SHBA-në për çështjen e Iranit, nëse do të kishte pasur rol në përcaktimin e qëndrimit britanik. Komentet vijnë në një moment delikat, duke pasur parasysh që roli i monarkut kërkon neutralitet politik, dhe mund të vendosin në siklet institucionin e monarkisë që tradicionalisht shmang përfshirjen në debate politike.
I pyetur nëse vizita e Mbretit kishte ndikuar në përmirësimin e marrëdhënieve me kryeministrin britanik, Trump e përshkroi Charles III si “të shkëlqyer” dhe “një mik shumë të mirë”, por kritkoi qeverinë e Londrës. Ai tha se, “nëse do të varej nga ai, do të na kishte ndihmuar me Iranin”, dhe shtoi se mbreti do të mbështeste edhe propozimet amerikane për Ukrainën, ndërsa nënvizoi mosmarrëveshjet me vendet evropiane.
Trump ripërsëriti sulmet ndaj kryeministrit Keir Starmer, duke pretenduar se kishte kërkuar mbështetje britanike në konflikt, por nuk kishte marrë përgjigje pozitive. Ai deklaroi: “I thashë a dëshiron të dërgosh ndihmë? Dhe ai tha se do ta dërgonte pasi të mbarojë lufta. Kjo nuk është mirë.” Më herët, Trump e ka krahasuar Starmerin me Winston Churchill, duke theksuar se “nuk është në të njëjtin nivel” dhe se marrëdhënia speciale SHBA–Britani “nuk është më ajo që ishte”.
Nga ana tjetër, Keir Starmer ka refuzuar vazhdimisht përfshirjen e Mbretërisë së Bashkuar në një konflikt me Iranin, duke argumentuar se një hap i tillë nuk i shërben interesave kombëtare. Gjatë një fjalimi në SHBA, Mbreti Charles III theksoi rëndësinë e ruajtjes së aleancës transatlantike, bëri thirrje për mbrojtjen e vlerave të përbashkëta dhe për shmangien e politikave izolacioniste.
Deklaratat e fundit të Trump pritet të nxisin debate të reja mbi marrëdhëniet SHBA–Britani dhe mbi rolin e figurave institucionale në çështjet e politikës së jashtme.
