Gjatë patrullimeve të shtuara të punonjësve të Komisariatit të Policisë Nr. 2 në rrugën “Ibrahim Rugova”, si pjesë e masave për garantimin e sigurisë së qytetarëve dhe parandalimin e ngjarjeve kriminale, u vu re një drejtues automjeti që kryente manovra të rrezikshme. Policia i bëri shenjë ndalimi, por ai nuk iu bind urdhrave të përsëritura dhe rriti shpejtësinë, duke përplasur automjetin e Policisë dhe vënë në rrezik jetën e punonjësve.
Shërbimet e Policisë filluan menjëherë ndjekjen dhe, në bashkëpunim me Forcën e Posaçme “Shqiponja” dhe Seksionin për Hetimin e Narkotikëve, në kuadër të operacionit të koduar “Efekti”, arritën të kapnin drejtuesin pas disa minutash te sheshi “Wilson”. I dyshuari, identifikuar si shtetasi M. P., 40 vjeç, banues në Tiranë, u arrestua. Gjatë arrestimit ai kundërshtoi me dhunë efektivët dhe vazhdoi t’i kundërshtojë gjatë shoqërimit në ambientet e Policisë.
Verifikimet e mëtejshme treguan se drejtuesi po drejtonte automjetin nën efektin e lëndëve narkotike dhe të alkoolit dhe pa leje drejtimi. Gjate kontrollit të automjetit u gjet dhe u sekuestrua si provë materiale një sasi e dyshuar lënde narkotike, kokainë.
Materialet procedurale lidhur me ngjarjen u referuan Prokurorisë së Tiranës për veprime të mëtejshme.
