Kompania ONE Albania ka njoftuar se nga 1 maji 2026 do të rrisë tarifat deri në 2.2%, duke u mbështetur te rritja e indeksit të çmimeve të konsumit nga INSTAT. Në pamje të parë, duket si një lëvizje “teknike”, e justifikuar nga ekonomia. Në realitet, për shumë qytetarë, kjo shihet si një tjetër mënyrë për t’u marrë më shumë para nga xhepi.
Sepse ndërkohë që inflacioni përdoret si arsye, askush nuk shpjegon pse rritja reflektohet menjëherë në tarifat që paguajnë abonentët, por jo në cilësinë e shërbimit apo në lehtësimin e kostove për ta.
Rritje pas rritjeje – një model i njohur
Ky nuk është një rast i izoluar. Prej kohësh, përdoruesit ankohen se paketat celulare po bëhen gjithnjë e më të shtrenjta, ndërsa alternativat reale në treg mbeten të kufizuara. Çdo “rritje e vogël” shtohet mbi tjetrën, duke krijuar një barrë të përhershme mujore.
Dhe pikërisht këtu lind dyshimi: a është inflacioni shkaku i vërtetë, apo thjesht një mbulesë për të rritur të ardhurat?
Konsumatori pa zë
Mesazhi i dërguar abonentëve e bën të qartë se kjo rritje bazohet në kontratë – pra, qytetarët nuk kanë shumë hapësirë për të kundërshtuar. Ata thjesht informohen se do të paguajnë më shumë.
Në një kohë kur çmimet e ushqimeve, qirave dhe shërbimeve bazë janë rritur ndjeshëm, çdo shtesë në faturën telefonike nuk është thjesht një numër – është një goditje direkte për buxhetin familjar.
Kush po paguan çmimin real?
Në fund të ditës, panorama është e qartë: inflacioni përdoret si argument, ndërsa barra reale bie mbi qytetarët. Ndërkohë, kompanitë si ONE Albania vazhdojnë të sigurojnë të ardhura më të larta.
Dhe kjo është ajo që po revolton gjithnjë e më shumë përdorues: ndjesia se çdo muaj paguajnë më shumë, jo sepse marrin më shumë shërbim, por sepse dikush tjetër ka vendosur ta “përshtatë” faturën në favorin e vet.
Në një mesazh të ndarë për të gjithë abonentët, ONE argumenton se rritja do të jetë deri në 2.2% mbi tarifën standarde të planit aktual tarifor, ndërsa shton se shkak për këtë ndryshim është bërë inflacioni.
“I nderuar Pajtimtar! ONE Albania ju njofton se me efekt nga data 1 Maj 2026, do të përshtatë tarifat për shërbimet celulare bazuar në ndryshimin mesatar vjetor të indeksit të çmimeve të konsumit (ICK) të publikuar nga Instituti i Statistikave (INSTAT), në nivelin jo më shumë se 2.2% mbi tarifën standarde të planit Tuaj tarifor. Kjo përshtatje kryhet ne përputhje me kushtet e kontratës së pajtimit. Ju mund të gjeni në këtë link https://rb.gy/uh8ixt tarifën e përditësuar të planit tuaj tarifor. Për më shumë info, ju lutem kontaktoni 123. Faleminderit”- thuhet në njoftim.
Ndërkohë, ky mesazh ka shkaktuar reagime te përdoruesit, të cilët e shohin çdo rritje çmimi si barrë shtesë në një periudhë ku kostot e jetesës janë rritur. Për shumë abonentë, edhe një rritje e vogël përkthehet në shpenzime më të larta mujore.
Sakaq, kjo nuk është hera e parë që kompania ONE abuzon me situatën duke njoftuar rritje të paketave celulare.
