Edhe pak dhe do të publikohet kalendari i Serie A për sezonin 2026–2027, që do të përcaktohet nga një algoritëm që do të vendosë 38 javët duke marrë në konsideratë “4 të reja të rëndësishme”. Kampionati nis më 23 gusht 2026 dhe përfundon në fundjavën 29–30 maj 2027. Kalendari përfshin periudha të ndryshuara pushimesh për ndeshjet e kombëtareve: periudha e parë shkakton pushim në dy raunde më 27 shtator dhe 4 tetor, ndërsa pauzat e tjera do të jenë në formatin klasik, me një raund pushim në mesin e nëntorit dhe një tjetër në fund të marsit. Dy raunde të Serie A do të zhvillohen në mesjavë, më 28 tetor 2026 dhe më 6 janar 2027. Parashikohet edhe pushim për Krishtlindje më 26 dhe 27 dhjetor.
Për të shmangur përplasjet me evente të mëdha tenisi, si ATP Finals të Torinos dhe Turneu Masters i Romës, algoritmi do të marrë në konsideratë këto ngjarje. Në raste kur përplasen aktivitetet, nuk do të lejohet zhvillimi i ndeshjeve derbi midis skuadrave të të njëjtit qytet, për shembull Juventus–Torino dhe Lazio–Roma. Për më tepër, nuk do të ketë ndeshje derbi gjatë javëve të fundit të kampionatit, konkretisht në javën e 37 dhe të 38.
Risia e fundit prek edhe përplasje të mundshme mes ekipeve që luajnë në kompeticionet evropiane. Skuadrat pjesëmarrëse në Champions League, Europa League dhe Conference League nuk do të përballen mes tyre në raundet që bien midis dy javëve radhazi kur zhvillohen këto kompeticione evropiane, për të lehtësuar oraret dhe ngarkesën e ekipeve që marrin pjesë në garat kontinentale.
Kalendari i ri synon të harmonizojë datat e kampionatit me kalendarët ndërkombëtarë dhe eventet e mëdha sportive, duke përdorur rregulla të përcaktuara nga algoritmi për të shmangur përplasje dhe për të riorganizuar pushimet dhe mesjavoret gjatë sezonit. Top Channel.
