Deputetët e Partisë Demokratike të Kosovës (PDK) dhe të Aleancës për Ardhmërinë e Kosovës (AAK) qëndrojnë në sallën e Kuvendit, duke kërkuar nga kryesuesi i seancës konstituive, Avni Dehari, që ta thërrasë vazhdimin e saj. PDK-ja kishte paralajmëruar se deputetët e saj do të paraqiteshin në Kuvend në orën 11:00, pavarësisht nëse Dehari e thërriste zyrtarisht seancën; të njëjtin qëndrim e mori edhe AAK-ja. Deputeti i AAK-së, Besnik Tahiri, deklaroi se deputetët e partisë së tij do t’u bashkohen atyre të PDK-së në sallën plenare dhe bëri thirrje që institucionet të garantojnë transparencë, duke pretenduar se mediat nuk po lejohen të marrin pjesë në seancë.
PDK-ja ka kërkuar hapjen e Kuvendit dhe vazhdimin e seancës konstituive, duke iu drejtuar kryesuesit me mesazhin “Reflektoni – HAPENI KUVENDIN!”. Ndërkaq, Dehari, në një postim në Facebook, rikujtoi se kur vitin e kaluar kishte kërkuar nga opozita të votonte për konstituimin e Kuvendit, përgjigjja kishte qenë se “nevojitet marrëveshje politike”. Sipas tij, atëherë tejkalimi i afatit nuk ishte problematizuar nga partitë opozitare. Ai pretendon gjithashtu se Gjykata Kushtetuese, në aktgjykimet e mëvonshme për konstituimin, u kishte kërkuar palëve të vazhdonin përpjekjet për konstituim edhe pas tejkalimit të afatit, duke e vlerësuar nevojën për konstituimin e Kuvendit si më të rëndësishme se afati.
Përplasja rreth vazhdimit të seancës vjen pasi ka përfunduar afati 30-ditor për konstituimin e Kuvendit, i përcaktuar me Kushtetutë dhe interpretuar nga Gjykata Kushtetuese në Aktgjykimin KO124/25. Rezultatet e zgjedhjeve të 7 qershorit u certifikuan më 8 korrik, ndërsa afati i 30 ditëve përfundoi më 7 gusht. Seanca konstituive nisi më 6 gusht, por nuk u përfundua zgjedhja e kryetarit dhe nënkryetarëve për shkak të mungesës së marrëveshjes politike. Për zbatimin e këtij aktgjykimi, 14 organizata të shoqërisë civile, të udhëhequra nga AVONET, i janë drejtuar Gjykatës Kushtetuese.
Në thelb të ngërçit mbetet çështja e zgjedhjes së presidentit: Lëvizja Vetëvendosje kërkon një marrëveshje të gjerë politike dhe një kandidat konsensual e jopartiak; LDK kërkon që posti t’i takojë asaj. PDK-ja kërkon respektim të procedurave kushtetuese dhe përfundim të konstituimit, ndërsa AAK fajëson Vetëvendosjen për bllokimin institucional. Bashkimi Evropian u ka bërë thirrje partive të arrijnë sa më shpejt një marrëveshje për kandidat të përbashkët për president, duke paralajmëruar se vonesat mund të pengojnë reformat dhe të ndikojnë në përfitimet e fondeve të BE-së. Sot është planifikuar edhe dita e tretë e aktivitetit “Bashkatdhetarët në Kuvend”, që nis në orën 12:00. /REL
