Ministria e Mbrojtjes njofton se deri në orën 14:00 janë raportuar 10 vatra zjarri, nga të cilat 5 mbeten aktive dhe 4 janë në monitorim. Në operacionet për shuarjen e tyre janë angazhuar 21 automjete zjarrfikëse dhe 153 forca operacionale, ndërsa në mbështetje janë angazhuar 125 efektivë të Forcave të Armatosura dhe 2 helikopterë të Forcës Ajrore.
Zona e Dajt vazhdon të mbahet nën monitorim. Në Cikallesh, bashkia Kavajë, zjarri është shuar plotësisht dhe po mbahet nën monitorim. Në Priskë e Madhe puna vijon me 4 automjete zjarrfikëse, 15 efektivë të MZSH-së dhe mbështetjen e 1 helikopteri të Forcës Ajrore; nuk raportohet rrezik për zonat e banuara.
Në Mallakastër, vatrat në Riban–Ngraçan–Panahor–Çyçen janë shuar plotësisht dhe po mbahen në monitorim. Zjarri në Drenie, bashkia Patos, është vënë nën kontroll të plotë dhe vijon monitorimi. Në Krujë, vatra në Abaze vijon aktive por sipas raportit nuk paraqet rrezik për zonat e banuara. Në Krastë, zjarri ka rritur intensitetin dhe është përhapur në masiv pyjor; në terren po operojnë forcat vendore, 50 efektivë të Forcave të Armatosura dhe 1 helikopter i Forcës Ajrore, dhe sipas njoftimit nuk ka rrezik për banesat.
Në Vilëz, bashkia Kurbin, ndërhyrja e forcave vendore dhe 35 efektivëve të Forcave të Armatosura bëri të mundur shuarjen e plotë të zjarrit në orën 13:00. Aktive mbeten gjithashtu vatrat në malin e Nemëçkës, bashkia Përmet, dhe në Goraj–Budishë, bashkia Malësi e Madhe; të dyja ndodhen në terrene të vështira dhe në lartësi të mëdha, por sipas Ministrisë nuk paraqesin rrezik për zonat e banuara.
Puna vijon në të gjitha vatrat aktive, ndërsa aktualisht nuk raportohet rrezik i drejtpërdrejtë për zonat e banuara. AKMC dhe strukturat e sistemit të mbrojtjes civile vazhdojnë koordinimin dhe monitorimin e situatës në të gjithë territorin.
