Një studente 23-vjeçare, Najmeh Amini, është dënuar me vdekje në Iran për fyerje të Profetit Muhamed, pas një postimi në rrjetet sociale. Amini, studente e kontabilitetit, mbahet në burgun Vakilabad në Mashhad dhe në një proces tjetër gjyqësor është dënuar me 12 vjet, gjashtë muaj e një ditë burg për vepra që lidhen me sigurinë kombëtare dhe përhapjen e propagandës kundër regjimit. Sipas një burimi pranë familjes, i cituar nga Aktivistët e të Drejtave të Njeriut në Iran (HRAI), ajo u shpall fajtore për veprën e njohur si “sab ol-nabi” (fyerje e Profetit).
Amini u arrestua gjatë protestave masive antiqeveritare të janarit, të cilat, sipas raporteve ndërkombëtare, u shtypën me dhunë; media lidhëse me HRAI raportoi më shumë se 50 mijë arrestime, ndërsa u raportua se mijëra persona u vranë gjatë trazirave. Organizatat për të drejtat e njeriut shprehin shqetësim për përdorimin në rritje të dënimit me vdekje si mjet për të shtypur kundërshtarët politikë dhe zërat kritikë ndaj regjimit. Organizatës për të Drejtat e Njeriut në Iran (IHRNGO), me seli në Oslo, i ka bërë me dije se më shumë se 600 persona janë ekzekutuar në Iran që nga fillimi i vitit.
Muajin e kaluar Amini publikoi një mesazh audio nga burgu, ku kërkoi ndërhyrjen e organizatave ndërkombëtare, Kombeve të Bashkuara dhe avokatëve për të ndjekur çështjen e saj. Ajo tha: “Nuk dua ta paraqes veten si heroinë sot. Dua vetëm një gjë: të jesh zëri im”, dhe shtoi se ishte “një vajzë e re e pafajshme, me kaq shumë shpresa dhe ëndrra” me prindër që e presin.
Drejtori i IHRNGO-së, Mahmoud Amiri-Moghaddam, e cilësoi rastin veçanërisht shqetësues, duke paralajmëruar se dënimi me vdekje për një postim në rrjetet sociale mund të krijojë një precedent të rrezikshëm, të normalizojë përdorimin e dënimit kapital kundër shprehjes paqësore dhe të zgjerojë rastet kur ai zbatohet. Sipas Kodit Penal Islamik të Iranit, neni 262 parashikon dënimin me vdekje për fyerjen e Profetit, ndërsa neni 263 përfshin disa përjashtime, si deklaratat pa qëllim ofenduese ose nën ndikimin e alkoolit. Gjatë gjyqit, mbrojtja tha se komentet u bënë pasi Amini kishte konsumuar kërpudha halucinogjene dhe kërkoi të merret parasysh gjendja e saj, por gjyqtari e hodhi poshtë këtë argument. Dënimi me vdekje nuk është përfundimtar dhe mund të apelohet në Gjykatën Supreme të Iranit.
