Kryeprokurorja e Zyrës së Prokurorisë Publike Europiane, Laura Kövesi, ishte në qendër të vëmendjes në Forumin Ekonomik të Delfit, ku trajtoi hapur çështjen e korrupsionit, drejtësisë dhe sidomos skandalin e menaxhimit të subvencioneve nga organizmi shtetëror grek OPEKEPE. Ky skandal, tha ajo, ka tronditur qeverinë konservatore me dorëheqje ministrash dhe heqje imuniteti për 13 deputetë. Kövesi shprehu habi dhe shqetësim për mënyrën se si funksionon sistemi në disa raste në Greqi: “Nëse bën një shkelje dhe vjedh para, i kthen dhe je i lirë”, duke vënë në dukje se kjo është e papranueshme dhe e kundërt me mënyrën evropiane të zbatimit të ligjit.
Ajo theksoi se Zyra e Prokurorisë Publike Europiane synon standard të përbashkët për të gjitha vendet dhe se kush është pjesë e këtij mekanizmi duhet të përshtatet. Kövesi kundërshtoi justifikimin e përhapur “Kështu bëhen gjërat në Greqi”, duke sjellë shembullin e një letre nga një fermere që nuk mori subvencione për shkak të mungesës së lidhjeve politike, ndërsa të tjerë përfitonin dhe bënin jetë luksoze. Për OPEKEPE-n ajo ishte e prerë: e konsideroi organizmin sinonim të korrupsionit, nepotizmit dhe klientelizmit, dhe nënvizoi se veprat në dosje janë krime në çdo vend të BE-së.
Kövesi sqaroi se heqja e imunitetit nuk nënkupton fajësi, por është e nevojshme për të vazhduar hetimet dhe mbledhur prova. Kundër akuzave për “ndjekje politike”, ajo deklaroi se zyra e saj vepron mbi bazë ligjore dhe jo politike. Po ashtu evidentoi kufizime serioze, përfshirë mungesën e personelit dhe volumin e madh të dokumenteve; si shembull përmendi “vetëm një oficer policie dhe dy prokurorë” për një hetim të tillë.
Kövesi vuri theksin te pavarësia e institucionit që ajo drejton, që e cilësoi “vijë e kuqe”, dhe kërkoi hapësirë për të punuar, shprehur besimin se autoritetet greke do të veprojnë si duhet. Ajo e quajti Prokurorinë Evropiane një sukses të madh, pasi për herë të parë ka ndikim të drejtpërdrejtë në jetën e qytetarëve dhe ndihmon ndërtimin e besimit përmes denoncimeve. Me një ton ironik, kur u pyet për raste të tjera të mundshme korrupsioni, tha se do të pyeste “Orakullin e Delfit”. Në përfundim, ajo thekoi se korrupsioni ekziston kudo, por fshehja e tij nuk e zgjidh problemin.
Reagimet në Greqi kanë përfshirë kritika të ashpra nga disa deputetë të Demokracisë së Re, me sulme personale dhe komente raciste që e lidhin figurën e Kövesi-t me Nicolae Ceaușescun, duke zhvendosur debatin nga thelbi i akuzave drejt sulmeve politike dhe personale.
