Në 48 orë, 3,500 qytetarë të Prrenjasit firmosën një peticion kundër bashkimit me bashkinë e Librazhdit në kuadër të Reformës Territoriale. Prrenjasi nuk është i vetmi vend që shpreh kundërshtim ndaj ndryshimeve të propozuara; qytetarët e Devollit më herët kanë depozituar një peticion me firmosje të madhe që kërkon të mbeten njësi më vete dhe përfshirjen në hartën e re të fshatit Dardhë, si dhe kërkojnë votim me referendum popullor nëse kërkesa nuk miratohet nga Kuvendi.
Në raportin përfundimtar të paraqitur sot në Kuvend nga Komisioni për Reformën Territoriale, citohet gjithashtu se Diaspora e Hasit në Mbretërinë e Bashkuar, përmes kanaleve diplomatike, shprehu shqetësim për çdo ndarje territoriale të Hasit dhe për implikimet e saj mbi kohezionin social dhe angazhimin e diasporës.
Kërkesa për konsultime më të afërta me komunitetet vjen edhe nga Bashkia Konispol, Këshilli Bashkiak i Poliçanit dhe një shoqatë vendore e atij qyteti, si dhe nga një shoqatë nga Fushë-Arrëza dhe qytetarë të njësive administrative Manëz, Ishëm e Sukth (Durrës). Ata argumentojnë se dëgjesat e përqendruara në qendrat e qarqeve kufizojnë pjesëmarrjen reale dhe kërkojnë që konsultimi të zbresë më pranë komuniteteve. Fushë-Arrëza shpreh bindjen se bashkia ka arsye të mbetet njësi më vete, duke evidentuar potencialet natyrore dhe trashëgiminë e zonës.
Banorë dhe përfaqësues të Velipojës kërkuan ndarjen nga Bashkia Shkodër dhe krijimin e një bashkie të veçantë, me argumente për distancën, potencialin turistik dhe vendimmarrjen më të afërt. Një grup përfaqësues i krahinës së Shpatit (Elbasan) parashtroi argumente historike, krahinore e demografike për krijimin e Bashkisë Shpat. Një subjekt politik i lidhur me komunitetin maqedonas kërkoi njësitë e dedikuara për zonat e Gollobordës dhe Gorës, me argumente identitare dhe minoritare, duke referuar rastin e Pustecit. Banorë të njësisë administrative Martanesh kërkuan kalimin nga Bashkia Bulqizë te Bashkia Tiranë, me argumente lidhjesh etno-kulturore dhe zhvillimi ekonomik.
Burim: Top Channel.
