Bashkimi Europian pritet të shtyjë për vitin e ardhshëm nisjen e sistemit Etias, pas problemeve të hasura me zbatimin e Sistemit Hyrje/Dalje (EES). Etias (Sistemi Europian i Informacionit dhe Autorizimit të Udhëtimit), i ngjashëm me modelin amerikan ESTA, do të prekë rreth 1.4 miliardë udhëtarë që aktualisht hyjnë në zonën Schengen pa viza, përfshirë qytetarët e Mbretërisë së Bashkuar dhe Shteteve të Bashkuara. Sipas rregullave të parashikuara, udhëtarët do të duhet të regjistrohen online përpara udhëtimit, të paguajnë një tarifë prej 20 eurosh dhe t’i nënshtrohen kontrolleve të sigurisë përpara se të marrin autorizimin për hyrje.
Vendimi për shtyrje lidhet me vështirësitë teknike dhe vonesat e EES, që kërkon regjistrimin e gjurmëve të gishtërinjve dhe imazheve të fytyrës për qytetarët jashtë BE-së. Probleme me EES kanë shkaktuar radhë të gjata në disa aeroporte dhe pika kufitare, duke ngritur shqetësime në industrinë e aviacionit për vështirësi gjatë sezonit veror të udhëtimeve. Agjencia europiane EU-Lisa, përgjegjëse për zbatimin e Etias, ka pranuar se nisja e sistemit deri në fund të këtij viti, siç ishte planifikuar, nuk duket më e realizueshme.
Bordi drejtues i EU-Lisa diskutoi në qershor mundësinë e shtyrjes së afatit dhe pritet të rivlerësojë çështjen në muajt e ardhshëm për të përcaktuar një kalendar të ri. Një zyrtar i informuar mbi procesin tha se ende ekzistojnë probleme teknike dhe se prioritet duhet të jetë stabilizimi i EES përpara se të vendoset një tjetër procedurë që mund të rrisë më tej vonesat në kufi. Komisioni Europian theksoi se përgatitjet për nisjen e Etias vazhdojnë, por se për sisteme të mëdha teknologjike duhet të merren parasysh faktorë të shumtë para aktivizimit.
Sistemi EES ishte planifikuar të hynte në fuqi në vitin 2022, por është shtyrë disa herë për shkak të problemeve me prokurimet, çështjeve teknike dhe ritmeve të ndryshme të përgatitjes në vendet anëtare. Disa zyrtarë të BE-së vlerësojnë se vonesa e Etias mund të jetë relativisht e shkurtër, ndërsa të tjerë e konsiderojnë të pamundur nisjen brenda këtij viti.
