Frank Caprio, një gjykatës amerikan i njohur për dhembshurinë dhe qasjen humane në drejtësi, ka ndërruar jetë në moshën 88-vjeçare. Lajmi u shpërnda nga familja e tij përmes rrjeteve sociale, sipas CNN. Caprio kishte shërbyer mbi katër dekada në Gjykatën e Qarkut në Providence dhe u emërua gjykatës në vitin 1985. Ai fitoi famë ndërkombëtare përmes programit televiziv “Caught in Providence”, i cili ishte nominuar për çmimin “Daytime Emmy” në vitin 2021. Klipet nga gjyqet e tij, ku ai dëgjonte me kujdes dhe empati historitë e qytetarëve, bënë xhiron e rrjeteve sociale dhe e vendosën atë në qendër të vëmendjes.
Në janar të vitit 2023, Caprio njoftoi largimin nga detyra për arsye shëndetësore dhe në fund të atij viti u diagnostikua me kancer të pankreasit. Familja e tij konfirmoi vdekjen e tij në një deklaratë emocionuese, duke theksuar se ai kishte kaluar një betejë të gjatë dhe të guximshme me sëmundjen. Ata e përshkruan atë si një person të dashur dhe të nderuar, i njohur për përulësinë dhe besimin në mirësinë e njerëzve. Më tej, ata theksuan se puna e tij kishte prekur jetët e miliona njerëzve dhe se trashegimia e tij është një simbol i mirësisë dhe drejtësisë.
Në nder të tij, familja bëri thirrje për të përhapur më shumë dhembshuri, siç ishte stili i tij i jetesës. Caprio do të kujtohet jo vetëm si një gjykatës, por edhe si burrë, baba, gjysh dhe mik i përkushtuar. Kontributi i tij në sistemin e drejtësisë dhe në jetët e individëve do të mbetet një kujtim i fuqishëm dhe një frymëzim për brezat e ardhshëm. Vdekja e tij ka lënë një boshllëk të pashlyer në komunitet dhe shumë njerëz do ta kujtojnë për përkushtimin e tij ndaj qytetarëve dhe ndihmën që ofroi përmes vendimeve të tij të mençura dhe të drejtë.
