Një 17-vjeçar që u plagos me armë zjarri nga shoku i tij ka ndërruar jetë; ai prej së dielës ndodhej në spital në gjendje kritike. Sipas policisë, i mituri u qëllua aksidentalisht nga shoku i tij 19-vjeçar me iniciale R. S., i cili është arrestuar së bashku me dy persona të tjerë.
Ngjarja ndodhi rreth orës 01:40, kur policia mori njoftim për një të plagosur me armë zjarri në rrugën “Berit Beker”. Shërbimet e Sektorit për Hetimin e Krimeve të Rënda shkuan menjëherë në vendngjarje për sqarimin e rrethanave dhe dokumentimin ligjor të rastit. Nga hetimet e para rezultoi se në banesën e shtetasit R. S., ky i fundit duke i treguar një pistoletë shokut të tij dhe duke menduar se në fole nuk kishte fishek, e ka shkrepur aksidentalisht, me pasojë plagosjen e 17-vjeçarit.
Policia njoftoi se ka sekuestruar armën e zjarrit që 19-vjeçari e posedonte pa leje. Pas veprimeve të para hetimore, R. S., 19 vjeç, u arrestua në flagrancë për veprat penale “Plagosja e rëndë nga pakujdesia”, “Veprime që pengojnë zbulimin e së vërtetës” dhe “Mbajtja pa leje e armëve dhe municionit luftarak”. Gjithashtu u arrestuan shtetasit A. V., 20 vjeç, dhe H. H., 22 vjeç, për veprën penale “Veprime që pengojnë zbulimin e së vërtetës”.
Hetimet vazhdojnë me qëllim dokumentimin e plotë të rastit dhe sqarimin e të gjitha rrethanave të ngjarjes. Materialet procedurale janë kaluar Prokurorisë për veprime të mëtejshme. Lajmi u bë i ditur nga policia gjatë së dielës, ndërsa informacioni u transmetua nga Top Channel.
