Rriten shqetësimet brenda NATO-s për veprimet e Rusisë dhe për mundësinë që Moska të kryejë provokime ndaj vendeve të Aleancës. Zëvendëskomandanti suprem i NATO-s në Europë, gjenerali britanik Sir John Stryger, e cilësoi Vladimir Putinin “gjithnjë e më të paparashikueshëm” dhe të gatshëm të marrë rreziqe, duke theksuar se vendet anëtare duhet të qëndrojnë veçanërisht të kujdesshme në një “mjedis të ndezshëm”. Stryger paralajmëroi se Rusia mund të përpiqet ta provokojë Aleancën për të nxitur një reagim të tepruar dhe për të krijuar përçarje mes vendeve anëtare.
Shqetësimet e aleatëve përfshijnë skenarë që lidhen me sabotime, spiunazh, si dhe sulme me dronë apo raketa. Disa liderë europianë paralajmërojnë se Moska mund të testojë reagimin e NATO-s përmes goditjeve që më pas mund të paraqiten si incidente aksidentale. Kryeministri polak Donald Tusk ka vënë në dukje rrezikun e sulmeve me dronë ose raketa të paraqitura në këtë mënyrë. Presidenti francez Emmanuel Macron ka kërkuar masa për mbrojtjen e infrastrukturës kritike kundër sulmeve të mundshme me dronë dhe kundër kërcënimeve në hapësirën kibernetike.
Megjithatë, disa zyrtarë europianë theksojnë se aktualisht nuk ka prova që Rusia po përgatit një konflikt të drejtpërdrejtë ushtarak me NATO-n. Presidenti i Letonisë, Edgars Rinkēvičs, tha se nuk po vërehet grumbullim i forcave ruse pranë vendeve baltike, ndërsa ambasadori amerikan në NATO, Matthew Whitaker, deklaroi se Putin nuk dëshiron një konflikt me Aleancën.
Presidenti ukrainas Volodymyr Zelensky paralajmëroi gjithashtu se Rusia mund të tentojë të godasë një shtet tjetër europian me dronë, raketa ose përmes një operacioni tokësor, me synimin për të përçarë vendeve europiane dhe për të dobësuar mbështetjen perëndimore për Ukrainën. Ai përmendi incidente me dronë dhe shkelje kufijsh në Moldavi, Rumani dhe Poloni, si dhe probleme të raportuara në aeroporte të Gjermanisë dhe vendeve të Europës Veriore. Zelensky u bëri thirrje vendeve europiane t’u përgjigjen shkeljeve, duke thënë: “Gjithmonë përgjigjuni. Nuk ka të bëjë me fillimin e një lufte. Nëse nuk u përgjigjeni rusëve, ata do të shkojnë më tej”.
NATO dhe qeveritë europiane përballen kështu me sfidën për të ruajtur gatishmërinë dhe për të parandaluar përshkallëzimin, ndërsa lufta në Ukrainë vazhdon.
