Aktorja fituese e çmimit Oscar, Natalie Portman, është bërë nënë për herë të tretë. Lajmi u bë i ditur pas publikimit të fotografive nga Page Six, ku Portman shfaqet në rrugët e Parisit së bashku me partnerin e saj, muzikantin Tanguy Destable, 46-vjeç, i cili mban në një transportues foshnjën e tyre të porsalindur. Sipas fotografive, Destable është parë duke u kujdesur për të porsalindurin gjatë shëtitjes së çiftit në qytet.
Portman dhe Destable kanë mbajtur lidhjen e tyre larg vëmendjes publike që prej fillimit të marrëdhënies në vitin 2025, ndërsa aktorja e njoftoi shtatzëninë e saj në prill. Në një intervistë për Harper’s Bazaar, Portman foli për emocionet lidhur me zgjerimin e familjes, duke e përshkruar përvojën si një “privileg” dhe një “mrekulli”. Ajo tha se “Unë dhe Tanguy jemi shumë të emocionuar” dhe shtoi se kjo ishte “ndoshta hera e fundit” që do të ishte shtatzënë. Portman vuri gjithashtu në dukje se këtë herë ndjen një qetësi dhe se e di me kë dëshiron të kalojë kohë dhe çfarë lloj energjie do të ketë rreth saj, siç e përshkroi vetë, çka e bën përvojën të bukur çdo ditë.
Natalie Portman jeton në Francë që prej vitit 2014. Ajo ishte e martuar me balerinin dhe koreografin Benjamin Millepied, me të cilin ka dy fëmijë: djalin Aleph, i lindur në vitin 2011, dhe vajzën Amalia, e lindur në vitin 2017. Martesa e tyre përfundoi në vitin 2023 dhe divorci u finalizua në shkurt të vitit pasardhës; Portman dhe Millepied ndajnë kujdestarinë e fëmijëve. Lidhja e Portman me Tanguy Destable u bë publike në mars të vitit 2025, kur të dy u fotografuan për herë të parë së bashku.
Tanguy Destable, i njohur me emrin artistik Tepr, ishte më parë në një lidhje me aktoren Louise Bourgoin, me të cilën ka dy djem.
