Një video e publikuar nga NASA tregon momentet kur astronautët e misionit Artemis II eksperimentojnë me një pikë uji brenda kapsulës Orion, duke shfrytëzuar kushtet e mikrogravitetit gjatë udhëtimit rreth Hënës. Ekuipazhi ka udhëtuar më larg se çdo mision i mëparshëm me njerëz, duke kaluar përtej anës së largët të Hënës dhe thyer rekorde në distancën nga Toka. Në pamje, një pikë uji formon një sferë pothuajse perfekte që noton lirshëm brenda kabinës.
Astronauti Jeremy Hansen, në fluturimin e tij të parë në hapësirë, shihet duke vëzhguar sferrën transparente ku reflektimi i tij duket i përmbysur për shkak të thyerjes së dritës. Më pas ai e manipulon me kujdes sferën përmes një kashte dhe e lejon sërish të lundrojë në mikrogravitet. NASA shpjegon se fenomeni ndodh për shkak të mungesës së gravitetit, ku forcat e tensionit sipërfaqësor bëjnë që uji të marrë formën më të qëndrueshme, atë të një sfere. “Mikrograviteti u lejon astronautëve të vëzhgojnë sjelljen e ujit në mënyra që nuk janë të mundshme në Tokë,” tha agjencia, duke përmendur se eksperimenti shërbeu si një mënyrë praktike për të kuptuar më mirë fizikën në hapësirë.
Videoja ka tërhequr vëmendje në rrjetet sociale; përdoruesit e kanë përshkruar si një moment “magjepsës” dhe “human” brenda një misioni teknikisht kompleks, dhe disa e kanë konsideruar si një kujtesë se eksplorimi hapësinor përfshin edhe kuriozitet dhe zbulim përtej shkencës dhe teknologjisë. Një pjesë e komentuesve ngritën shqetësime për sigurinë, duke vënë në dukje afërsinë e ujit me pajisjet elektronike brenda kapsulës Orion; NASA nuk ka raportuar asnjë problem gjatë eksperimentit.
Misioni Artemis II zgjati rreth 10 ditë dhe e çoi ekuipazhin në një distancë rekord prej rreth 406,000 kilometrash nga Toka. Ai shënon një prej fluturimeve më të rëndësishme hapësinore të dekadave të fundit dhe, sipas njoftimeve të agjencisë, hap rrugën për misionet e ardhshme drejt Hënës dhe më tej.
