Kontrollet e Policisë së Durrësit për ndotjen akustike në zonat turistike çuan në ndëshkimin e dy pronarëve të lokaleve në Golem, të cilët u gjobitën me nga 200 000 lekë të rinj secili, pasi matjet e autoriteteve konstatuan se muzika në ambientet e tyre tejkalonte kufijtë e lejuar nga ligji, gjatë mbrëmjes. DVP Durrës njofton se vijon kontrollet për nivelin e zhurmave dhe zbatimin e orarit të aktivitetit me muzikë.
Shërbimet e Stacioneve të Policisë Golem dhe Plazh, sipas hartëzimit të zonave me risk për ndotje akustike dhe bazuar në ankesat e qytetarëve, kanë vijuar kontrollet në terren. Në kuadër të këtyre veprimeve janë testuar me matës zhurme disa ambiente dhe subjekte, të hapura dhe të mbyllura, në zona turistike, për verifikimin e respektimit të nivelit kufi të lejuar të zhurmës, të përcaktuar në ligjin nr. 9774, datë 12.07.2007 “Për administrimin e zhurmës në mjedis”, i ndryshuar.
Matjet u realizuan sipas kushteve të përcaktuara në procedurën standarde për këtë qëllim dhe nga ato rezultoi se në dy lokale në Golem ishte muzikë mbi nivelin e lejuar. Për këtë shkelje, pronarët e lokaleve, shtetasit G. Gj., 46 vjeç, dhe F. S., 30 vjeç, u ndëshkuan secili me masë administrative prej 200 000 lekësh të rinj.
Përveç matjes së nivelit të zhurmës, strukturat përgjegjëse kanë ushtruar kontrolle edhe për respektimin e orarit të lejuar për gjenerimin e muzikës në ambiente të hapura në zona apo qendra të banuara, i cili, sipas njoftimit, është nga ora 11:00 deri në orën 24:00. Autoritetet theksuan se vijon intensivisht zbatimi i detyrave të parashikuara në planin e masave për garantimin e sigurisë publike gjatë sezonit turistik veror.
Burimi: Top Channel.
