Mbrëmjen e së mërkurës, një tragjedi e rëndë goditi familjen Kola në Itali, e cila përfshiu katër anëtarë: Arti, 44 vjeç, bashkëshorten e tij Jonida, 48 vjeç, djalin Hajdar, 22 vjeç, dhe vajzën Xhesika, 15 vjeçe. Të gjithë ata humbën jetën në banesën e tyre në lagjen Rughi për shkak të helmimit nga monoksidi i karbonit.
Sipas raportimeve, Hajdari telefonoi numrin e emergjencës 112 në orën 19:58, duke thënë se motra e tij ndjehej keq. Telefonata zgjati 11 minuta, por gjatë saj ai humbi ndjenjat për shkak të helmimit dhe e dha adresën e gabuar, çka shkaktoi vonesë në ndërhyrjen e ambulancës. Ajo mbërriti në vend rreth orës 20:03, por nuk mundi ta gjejë shtëpinë për shkak të informacionit të pasaktë, duke kërkuar ndihmën e fqinjëve dhe karabinierëve për të lokalizuar adresën e saktë. Ekipet e urgjencës arritën në vend rreth orës 21:46.
Xhaxhai i viktimave, Turim Kola, dhe dy karabinierë që tentuan të hyjnë në banesë, përjetuan pengesa për shkak të mungesës së oksigjenit dhe u detyruan të kërkonin ndihmë mjekësore. Pavarësisht përpjekjeve, medicinët konstatuan se të katër anëtarët ishin të vdekur. Xhaxhai i viktimave e përshkroi tragjedinë duke thënë se nuk arriti t’i shpëtonte ata.
Prokuroria ka nisur hetimet për të verifikuar standardet e instalimit të kaldajës së re që ishte vendosur në banesë, e cila ishte blerë rreth tre vjet më parë dhe ishte banuar vetëm për 6-7 muaj. Ngjarja ka tronditur komunitetin e Porcarit, ku familja Kola gëzonte një reputacion të lartë. Në shenjë zie, është anuluar parada e Karnavaleve, ndërsa në kishën San Giusto janë organizuar vigjilje lutjeje.
Shokët e vajzës Xhesika në shkollë kanë krijuar një memorial për atë, duke mbledhur poezitë e saj dhe vendosur lule dhe tullumbace të kuqe në formë zemre para shtëpisë së familjes. Tragjedia e familjes Kola është një dhimbje e madhe për komunitetin, duke lënë pas një boshllëk të thellë.
