Autoriteti Rrugor Shqiptar (ARRSH) ka reaguar lidhur me situatën në vend pas reshjeve të fundit të shiut dhe dëborës, të shoqëruara me temperatura të ulta gjatë natës. Sipas ARRSH, reshjet e dëborës tashmë kanë pushuar dhe vendi është aktualisht nën ndikimin e reshjeve të shiut me intensitet të ulët deri në mesatar, bashkë me një rritje të temperaturave.
Grupet e punës me mjetet borëpastruese kanë qëndruar në terren gjatë natës, duke punuar për pastrimin e rrugëve nga inertet dhe gurët, si dhe për shpërndarjen e kripës në akset rrugore ku ka pasur rrezik për ngrica. ARRSH informon se qarkullimi i mjeteve po vazhdon normalisht në të gjitha akset rrugore të vendit.
Megjithatë, autoritetet i bëjnë thirrje drejtuesve të mjeteve për të treguar kujdes të shtuar dhe për t’u pajisur me goma dimërore e zinxhirë, sidomos kur udhëtojnë në zonat malore ku ende ka praninë e dëborës. Kjo masë është e domosdoshme për të garantuar sigurinë e udhëtarëve, duke minimizuar rrezikun e aksidenteve në kushte të jashtëzakonshme atmosferike.
Në këtë kontekst, ARRSH po monitoron situatën e motit vazhdimisht për t’u përgjigjur menjëherë ndaj çdo ndryshimi që mund të ndodhi, në mënyrë që të sigurojë një qarkullim të sigurt dhe të pandërprerë në rrugët e vendit.
