Pasi përmbytjet e rënda goditën Greqinë Perëndimore, banorët e prekura vazhdojnë të numërojnë dëmet. Në rajonet e Epirit, Korfuzit dhe Kosturit, situata është dramatike me fusha të përmbytura, rrëshqitje dheu dhe fshatra të izoluara. Mungesa e energjisë elektrike dhe ujit të pijshëm është problematikë në shumë komunitete. Katër prefektura dhe gjashtë bashki të Epirit janë shpallur në gjendje emergjence.
Në Korfuz, ekipet e pastrimit janë në veprim, por reshjet vazhdojnë të rikthehen, duke rritur shqetësimin e banorëve për qëndrushmërinë e territorit. Mbrëmë, pavarësisht se reshjet nuk ishin aq të fuqishme, ato kontribuan në rritjen e pasigurisë. Në zonat malore, erozioni ka krijuar rreziqe nën themelet e banesave, ndërsa rruga bregdetare ka pësuar dëme të mëdha dhe nuk është e kalueshme. Autoritetet përkatëse kanë nisur inspektimet për të vlerësuar dëmet, të cilat përllogariten në disa miliona euro.
Kryebashkiaku i Korfuzit të Veriut e përshkruan situatën si kritike, me 20 komunitete që përballen me mungesën e ujit, energjisë dhe aksesit. Ai ka urdhëruar mbylljen e shkollave edhe për nesër. Situata është e ngjashme në Arta, Janinë, Prevezë dhe Thesproti, me Janinën që vazhdon të ndeshet me reshje shiu dhe me rënien e flokëve të parë të dëborës në zonat malore.
Sipas parashikimeve të sinoptikanëve, pritet një përmirësim gradual në orët në vijim, megjithatë, ata paralajmërojnë se një cikël i ri reshjesh mund të fillojë nga e martaja, duke vështirësuar akoma më shumë jetesën në këtë pjesë të vendit. Situata në të gjithë këto zona kërkon vëmendjen e shpejtë dhe të koordinuar të autoriteteve për të adresuar dëmtimet dhe nevojat emergjente të banorëve.
