Rreth orëve të para të mëngjesit, Policia Kufitare mori njoftim se një mjet lundrues me 11 persona në bord ndodhej në rrezik, rreth tetë milje larg grykëderdhjes së lumit Vjosë. Menjëherë pas sinjalizimit, shërbimet e Policisë Kufitare u nisën drejt zonës me dy mjete lundruese tip gomone dhe arritën të lokalizojnë mjetin. Forcat bënë të mundur shpëtimin e të gjithë personave që ndodheshin në bord dhe i transportuan në tokë.
Sipas të dhënave paraprake, emigrantët janë shtetas të pesë vendeve të ndryshme të Afrikës dhe Azisë. Numri i personave sipas shtetësive është: 1 nga Haiti, 1 nga Afganistani, 1 nga Liberia, 3 nga Pakistani dhe 5 nga Bangladeshi. Të gjithë janë dërguar në ambientet e Drejtorisë Vendore të Policisë Vlorë, ku po kryhen procedurat e nevojshme.
Ende nuk është përcaktuar destinacioni i tyre apo nëse po tentonin të kalonin drejt Italisë me mjetin e vogël lundrues. Kjo pritet të sqarohet pas marrjes në pyetje të emigrantëve dhe përfundimit të veprimeve hetimore nga autoritetet kompetente. Për momentin po vazhdojnë veprimet standarde procedurale në Drejtorinë Vendore të Policisë Vlorë, sipas njoftimeve paraprake.
