Pas dy vitesh hetimes, Prokuroria e Tiranës ka vendosur masa sigurie për pesë persona, përfshirë mjekë dhe ekspertë mjekoligjorë, të akuzuar për “vrasje nga pakujdesia”, “mashtrim në bashkëpunim” dhe “shpërdorim detyre.” Hetimi lidhet me rastin tragjik të vdekjes së 3-vjeçarit, Brian Spahiu, pas një ndërhyrje dentare në klinikën “Splendent” në Tiranë.
Sipas një ekspertize të kryer në Itali, shkeljet e protokolleve mjekësore gjatë trajtimit janë konstatuar të jenë shkaku kryesor i vdekjes së të miturit. Mjeku Roland Xhaxho dhe e bija Ina Xhaxho janë lënë nën masën “arrest në shtëpi.” Ndërkohë, prokuroria ka kërkuar masën “arrest në burg” për dy persona të tjerë, I.Xh dhe M.G, por gjykata vendosi masën e sigurisë “arrest në shtëpi” për ta.
Sipas verdiktit të prokurorisë, pacienti B.S., i cili u nënshtrua një ndërhyrjeje për 14 dhëmbë, pas operacionit u dërgua në gjendje të rëndë në Spitalin e Pediatrisë, ku ndërron jetë më 1 tetor 2023. Ekspertët italianë identifikuan se shoku septik dhe insuficenca organike ishin shkaku i vdekjes dhe konstatonin shkelje të rënda të protokolleve.
Grupi ekspert i ka raportuar mangësi në procedurat e para-ndërhyrjes, duke mos kryer kontrollet e nevojshme dhe diagnoza të saktë, si dhe duke realizuar një ndërhyrje më të gjerë nga sa lejohej për fëmijët. Problemet e tjera përfshijnë përdorimin e anestezisë për periudha të gjata dhe largimin e papërshtatshëm të fëmijës nga spitali.
Për më tepër, ekspertët italianë identifikuan shkelje edhe në autopsinë dhe ekspertizën mjekoligjore të kryer nga ekspertët e I.M.L., E.S dhe E.A. Si pasojë, janë marrë në hetim mjekët reanimatorë që u dhanë ndihmë të miturit, të dyshuar për neglizhencë në trajtimin e tij. Ky rast ka ngjallur shqetësime për standardet mjekësore dhe procedurat e sigurisë në trajtimin e fëmijëve.
