Kryeministri grek Kyriakos Mitsotakis u përgjigj për çështjet që lidhen me Shqipërinë dhe rrugëtimin e saj drejt Bashkimit Europian gjatë konferencës së zakonshme për shtyp në kuadër të Panairit të 90-të Ndërkombëtar të Selanikut. I pyetur për marrëdhëniet me Tiranën, pronat dhe të drejtat e minoritetit grek, Mitsotakis tha se Athina mbështet perspektivën europiane të Ballkanit Perëndimor, por se çdo vend do të vlerësohet veç e veç për progresin e tij.
Për regjistrimin e pronave dhe mbrojtjen e të drejtave të minoritetit grek në Shqipëri, ai vlerësoi se “Progresi që është bërë në regjistrimin e pronave dhe në mbrojtjen e të gjitha të drejtave nuk është i mjaftueshëm. Të jeni të sigurt se, në momentin e duhur, do të ushtrojmë të drejtat tona për t’u siguruar që të drejtat e minoritetit mbrohen plotësisht.” Mitsotakis theksoi se çështja nuk është vetëm dypalëshe, por lidhet me respektimin e së drejtës europiane dhe se hapja e mbyllja e kapitujve të negociatave kërkon miratimin e vendeve anëtare të BE-së.
Sa i përket Maqedonisë së Veriut, ai tha se nuk ka, në thelb, asnjë progres në negociatat europiane dhe se vendi ndodhet në një fazë shumë më të hershme krahasuar me Shqipërinë.
Konferenca u mbajt një ditë pas prezantimit nga Mitsotakis në Selanik të një pakete të gjerë masash ekonomike që përfshin rritje pagash dhe pensionesh, ulje taksash dhe ndihma për familjet, fermerët dhe bizneset — masa që do të zbatohen nëse ai fiton një mandat të tretë në zgjedhjet parlamentare të parashikuara për pranverën e vitit 2027. Fjalimi me masat ekonomike u prit me skepticizëm nga partitë opozitare dhe disa media kritike ndaj qeverisë. Ndërkohë, mijëra qytetarë, sindikata, fermerë dhe organizata protestuan në qendër të Selanikut të shtunën në mbrëmje kundër kostos së lartë të jetesës dhe politikave të qeverisë.
