Që nga viti 2023, në Shtetet e Bashkuara janë regjistruar të paktën 10 vdekje ose zhdukje të shkencëtarëve dhe zyrtarëve me akses në sekrete të ndjeshme bërthamore dhe hapësinore, në rrethana të paqarta. Rastet kanë ngritur alarmin në Uashington, pasi shumë prej personave të zhdukur nuk kanë lënë asnjë gjurmë. Presidenti Donald Trump reagoi për herë të parë, duke e cilësuar situatën “shumë serioze” dhe duke paralajmëruar se brenda pak ditësh mund të ketë më shumë qartësi. Presioni publik dhe kritikat ndaj administratës për reagim të vonuar janë rritur. Zëdhënësja e Shtëpisë së Bardhë, Caroline Levitt, tha se po shqyrtohet mundësia e një hetimi nga agjencitë e inteligjencës nëse konfirmohet ndonjë lidhje mes rasteve.
Një nga rastet më të bujshme është zhdukja e gjeneral-majorit në pension të Forcave Ajrore, William Neil McCasland, i cili u pa për herë të fundit në New Mexico, duke lënë pas sendet personale dhe duke marrë vetëm një armë. Ngjarje të ngjashme përfshijnë zhdukjen e kontraktorit qeveritar Steven Garcia, si dhe dy punonjësve të Laboratorit Kombëtar të Los Alamos, Anthony Chavez dhe Melissa Cassias, të cilët u zhdukën pa gjurmë në vitin 2025.
Mes rasteve përmendet edhe zhdukja e Monica Jacinto Reza, një drejtuese ekipi në NASA Jet Propulsion Laboratory, si dhe vdekjet e pashpjegueshme të studiuesve të përfshirë në programin DART të NASA. Të paktën dy shkencëtarë, Karl Grillmayr dhe Nuno Loureiro, janë vrarë në rrethana të dhunshme, duke shtuar dyshimet për një model të mundshëm kriminal ose spiunazhi.
Ish-zyrtari i lartë i FBI, Chris Sweeker, sugjeron se pas këtyre rasteve mund të fshihet spiunazhi modern, ndërsa përmenden edhe shqetësime për interesin e vendeve rivale si Kina, Rusia dhe Irani. Autoritetet amerikane nuk kanë dhënë ende një shpjegim të plotë për ngjarjet, duke lënë hapur një nga misteret më të mëdha të viteve të fundit në fushën e sigurisë kombëtare.
