Thinking Machines Lab synon të krijojë një inteligjencë artificiale që “vërtet dëgjon ndërsa flet”. Startupi i themeluar vitin e kaluar nga ish-drejtoresha teknologjike e OpenAI, Mira Murati, prezantoi nismën e quajtur “interaction models” — modele ndërveprimi që lejojnë AI-në të ndërpresë dhe të bashkëveprojë më natyrshëm gjatë bisedave.
Teknologjia synon të ndryshojë mënyrën tradicionale të punës së modeleve të sotme: tashmë shumica funksionojnë në mënyrë turn-by-turn, ku përdoruesi flet, makina dëgjon, pastaj përgjigjet dhe përdoruesi dëgjon. Thinking Machines kërkon një model që përpunon inputin dhe gjeneron përgjigjen njëkohësisht, duke bërë bashkëbisedimin më të ngjashëm me një telefonatë njerëzore sesa me shkëmbim mesazhesh. Termi teknik për këtë aftësi është “full duplex”.
Kompania thotë se modeli i saj provues, TML-Interaction-Small, përgjigjet brenda 0.40 sekondash, një shpejtësi që i afron ndërveprimit me ritmin e bisedës njerëzore dhe që sipas saj është shumë më i shpejtë se modelet aktuale të OpenAI dhe Google. Megjithatë, zhvilluesit e përshkruajnë për momentin këtë si një demonstrim kërkimor dhe jo si një produkt të gatshëm për publikun; nuk parashikohet një lançim i menjëhershëm. Kompania thotë se do të kryejë teste gjatë muajve në vijim dhe se më vonë gjatë vitit mund të jetë e mundur që produkti të jetë i gatshëm për përdorim të gjerë.
Ekspertët e përmendur në raport vlerësojnë se rezultatet teknike duken mbresëlënëse, por theksojnë se për të konfirmuar përputhshmërinë e përvojës reale me pretendimet e kompanisë do të duhen përdorues që ta provojnë vetë teknologjinë. Për momentin, informacionet rreth performancës në përdorim real mbeten në pritje të testimeve të mëtejshme dhe një lansimi potencial.
