Informacion mbi të lënduarit, 18 tetor 2026, ora 16:00
Ministria e Shëndetësisë dhe Mirëqenies Sociale njofton se, deri më tani, në Spitalin Universitar të Traumës kanë mbërritur tre persona: një efektiv policie, një minoren 15 vjeç dhe një përfaqësuese e medias. Sipas njoftimit zyrtar, gjendja e tyre është stabile. Personat e lënduar po i nënshtrohen ekzaminimeve dhe po marrin trajtimin përkatës nga stafet mjekësore dhe infermierore të spitalit.
Ministria përgënjeshtron kategorikisht lajmin që po qarkullon për humbjen e jetës së një të mituri, duke theksuar se ky informacion është i pavërtetë. Në reagim theksohet se përhapja e informacioneve të pasakta mund të shkaktojë panik dhe shqetësim te familjarët, si dhe tensione të panevojshme në opinionin publik.
Në shkrim bëhet thirrje drejt mediave dhe opinionit publik që të tregojnë përgjegjësi në verifikimin dhe në shpërndarjen e informacioneve. Ministria kërkon që lajmet dhe raportimet të bazohen vetëm në të dhëna të konfirmuara zyrtarisht për të shmangur përhapjen e lajmeve të rreme dhe pasojat negative që ato mund të krijojnë për personat e përfshirë dhe publikun në përgjithësi.
Njoftimi përfundon me theksin se informacionet zyrtare mbi gjendjen e të lënduarve do të vijnë nga burimet kompetente, ndërsa çdo lajm i paverifikuar përfundimisht duhet të trajtohet me kujdes deri në konfirmim zyrtar. Top Channel
