Ministria e Punëve të Jashtme reagoi për incidentin e dhunshëm të raportuar një ditë më parë në Zvërnec, ku një protestues u dhunua nga punonjës të sigurisë private të një kantieri. Në reagim, ministria shprehu keqardhje për ngjarjen dhe bëri të ditur se po qëndron në kontakt me autoritetet greke, për shkak se personi i dhunuar ka shtetësi shqiptare dhe greke.
Sipas deklaratës zyrtare, autoritetet e të dy vendeve kanë pasur komunikim të vazhdueshëm në nivele të ndryshme. Ministria theksoi se Shqipëria mbetet e përkushtuar për forcimin e marrëdhënieve me Greqinë, “të bazuara në respektin e ndërsjellë, dialogun e hapur dhe vlerat e përbashkëta evropiane”. Në lidhje me përgjigjen institucionale ndaj incidentit, institucioni informoi se autoritetet shqiptare kanë ndërmarrë masa hetimore dhe proceduriale.
Në vijim, u bë e ditur se është identifikuar dhe arrestuar njërin prej punonjësve të shoqërisë së sigurisë, i akuzuar si përgjegjës për dhunën e ushtruar ndaj protestuesit me dy shtetësi. Dy punonjës të tjerë të kompanisë së sigurisë janë proceduar penalisht, sipas të dhënave të publikuara nga Ministria e Jashtme. Po ashtu, është inicuar një hetim disiplinor për të verifikuar rrethanat e ngjarjes dhe për të përcaktuar përgjegjësi institucionale të mundshme.
Deklarata thekson se mbrojtja dhe promovimi i të drejtave të njeriut mbeten vlera themelore të demokracisë dhe shtetit të së drejtës në Shqipëri. Ndërhyrjet prokuroriale dhe ato disiplinore janë prezantuar si pjesë e përpjekjeve për të sqaruar ngjarjen dhe për të ndjekur rrugët ligjore për përgjegjësit.
Pas protestës, kreu i Policisë së Shtetit, Skënder Hita, njoftoi pezullimin nga detyra të drejtuesit të policisë së Vlorës. Pezullimi u motivua nga një raportim i gabuar i këtij drejtuesi, i cili kishte deklaruar se një qytetar ishte futur me forcë brenda rrethimit të kantierit.
